Тыа хаһаайыстыбатын министиэристибэтин чахчытынан, балаҕан ыйын 19 күнүнээҕи туругунан, 5 328 гектар бааһынаттан баалабайынан 48 910 туонна хортуоппуй хомуллан, хас гектар ахсыттан 91 сэнтиниэр үүнүү ылыллыбыт. Итини таһынан, 616 гектар бааһынаттан 14 681 туонна оҕуруот аһа, ол иһигэр, 3 993 туонна хаппыыста, 1 284 туонна моркуоп, 1 194 туонна сүбүөкүлэ итиэннэ 1 148 туонна араас оҕуруот аһа хомуллубут. Тэпилииссэлэртэн 7 062 туонна оҕуруот аһа хомуллубут. Ортотунан хас биирдии гектартан 124 сэнтиниэр үүнүү ылыллыбыт.
Улуустартан саамай улахан ыһыылаах Өлүөхүмэ буолар. Улуус сүрүн агронома Сардаана Никитина иһитиннэрбитинэн, бас билии көрүҥүттэн тутулуга суох, өлүөхүмэлэр аҥардас хортуоппуйу 709 гектарга олордубуттар.
-- Улуус бөдөҥ хаһаайыстыбата «Саҥыйахтаах» кэпэрэтиип хортуоппуйун хамбаайынан хомуйар. Оттон атын хаһаайыстыбаларга оскуола оҕолоро итиэннэ Өлүөхүмэтээҕи тыа хаһаайыстыбатын мэхэньисээссийэтин уонна электрификациятын устудьуоннара көмөлөһөллөр. Ол курдук, Дабааҥҥа П. Тыкынаев салайар бааһынай хаһаайыстыбатыгар 10 устудьуон, Өлүөхүмэ куорат таһыгар баар Кириэс бааһынатыгар А. Кирсанов биирдэм тэрилтэтигэр 20 устудьуон, I Нөөрүктээйи нэһилиэгэр А. Филиппов уонна Л. Габышев салайар бааһынай хаһаайыстыбаларыгар олохтоох орто оскуола үөрэнээччилэрэ, Өлүөхүмэ Амматыгар С. Ощепков бааһынай хаһаайыстыбатыгар 30 устудьуон уонна олохтоох оскуола үөрэнээччилэрэ үлэлии-хамсыы сылдьаллар. Күн бүгүҥҥү туругунан, улуус үрдүнэн 572 гектар иэннээх бааһынаттан 4 269 туонна хортуоппуй хомулунна, итинэн хас биирдии гектар ахсыттан ортотунан 75 сэнтиниэр үүнүү ылылынна. Федор Романов биирдэм тэрилтэтэ балаҕан ыйын 17 күнүттэн хаһаайыстыбалартан уонна нэһилиэнньэттэн хортуоппуйу тутууну саҕалаата. Барыта 800 туонна хортуоппуйу уонна 27 туонна оҕуруот аһын, ол иһигэр хаппыыстаны хомуйар сорудахтаах, -- диэн кэпсээтэ улуус сүрүн агронома.
-
2
-
0
-
0
-
0
-
0
-
0
