Урукку олоххо, ааспыт үйэҕэ учуутал диэн үрдүк ааты сүкпүт киһилиин алтыһыы «хараҥаҕа тыкпыт сырдык» диэн сыаналанара. Чахчыта да оннук. Билии-көрүү, сайдыы-үүнүү хайа да үйэҕэ, ханнык да тутуллаах дойдуга урут да, билигин да олох уталыйбат, уларыйбат ирдэбилэ.
Бу нэдиэлэҕэ маннык үтүөкэн идэни баһылаабыттарга анаммыт араас тэрээһиннэр буоллуллар. Биир оннук улахан түһүлгэ туhунан сырдатыам.
«Үтүө ыал үөлэһэ куруутун кыымнаах» диэн өркөн өй дөөх өбүгэбит олус да сөпкө эппит. Ол курдук, биһиги Хатаспыт нэһилиэгин тумус туттар киһитэ, ытык олохтооҕо Аркадий Михайлович Уваровскай олоҕун кыыма күн бүгүн даҕаны дьону-сэргэни угуйар, ыҥырар. Кини сиэнэ Туяра Андреевна Попова СӨ «Сыл бастыҥ учуутала — 2023» күрэх лауреата буолла! Туяра Андреевна бу иннинэ хас да күрэххэ муҥутуур кыайыылаах аатын ылан кэлбитэ. Чурапчы улууһугар 2022 сылга эдэр учууталлар күрэхтэрин уопсастыбаннай наукаҕа хайысхатын кыайыылааҕа. 2023 сылга Өлүөнэ өрүс нөҥүө улуустарга эдэр учууталлар күрэхтэрин муҥутуур кыайыылаҕа буолбута.
Туяра Андреевна учуутал идэтин Санкт-Петербург куоракка үөрэнэн баһылаабыта. Кэлиҥҥи сылларга Чурапчы улууһугар олус таһаарыылаахтык уонна көхтөөхтүк үлэлии сылдьарыттан биһиги биир дойдулаахтара астынабыт, үөрэбит. Манна даҕатан эттэххэ, үлэлиир Чурапчы улууһун Д.Г. Барашков аатынан Бахсы орто оскуолатын дириэктэрэ хаан-уруу эдьиийэ Алина Аркадьевна Гоголева буоларынан эмиэ киэн туттабыт. Бахсы сириттэн Саха Сирин ааттатар үгүс элбэх ааттаах-суоллаах дьон норуот хаһаайыстыбатын бары салаатыгар баалларын бары да билэбит.
Туйаара саҥаһа Светлана Никандровна Попова Хатас орто оскуолатыгар учууталлыыр, кыра балтылара Күннэйэ эмиэ бу оскуолаҕа бухгалтердыыр. Аркадий Михайлович өссө биир сиэнэ, Айталина Евгеньевна Нестерева, Хатас орто оскуолатыгар ситиһиилээхтик үлэлиир. Онон көлүөнэ ситимэ баар.
Наталья Руфова, Хатас с.
-
5
-
3
-
0
-
0
-
0
-
0
