Төрөөбүт тыл уонна сурук-бичик күнүн көрсө кини хоһоонноруттан таһаарабыт.
ТЫЛ
(уран тыл уустарыгар)
Тыл элбэх киһини
Биир тэҥник хомотуон сөп эбит...
Тыл этэр санааҕын
Биир тэҥник тиэрдимиэн сөп эбит.
Тыл өлбүт киһини
Ииниттэн туруоруон сөп эбит!
Тыл тыыннаах киһини
Олохтон матарыан сөп эбит!
Оҕоком! Тылгын кыана туттаар,
Мин курдук куолулаан
Чугас доҕотторгун
Хомотор буолумаар!
Мин курдук буолумаар...
Төрөөбүт уус тылгын
Куруутун харыстаар,
Бу – барҕа баайым диэр!
Тылыҥ иччилээҕин
Эн хаһан эмитэ
Сиппит толкуйунан
Өйдүүргэ дьулуһаар!
Эн тылыҥ ырыалаах,
Арчылыыр алгыстаах,
Харыстыыр ыйаахтаах,
Сахалыы буолуохтун!
Тыл элбэх киһини
Умсары тарпыта,
Биир, оччо киһиэхэ
Куорсун анньыбыта.
Тыл улуу тапталы, айылҕа кэрэтин
Киһилии толкуйга аан маҥнай көрбүтэ.
Тыл – улуу, тыл – сүдү,
Илбистээх, имэҥнээх.
Тыл – киһи, тыл – омук,
Иэйиилээх, иччилээх!
* * *
Ийэ тылым иэйиитин иһиллии,
Төрүт дорҕоон төрүүрүн көрө -
Сис тыаны бүрүнэн сытар
Үрдүк таас чыпчаалын дабайдым…
Илин халлаан сырдаатар сырдаан,
Күн көмүс күөнүнэн бүрүллэн,
Сылаас тыын көхсүм уутунан
Сүүмэх буолан сүүрэлии оонньоото.
Харахпын симэбин – көтүү…
Көтүтүү… Үрүҥ сылгы көҕүлэ,
Иннибэр үүнэн эрэ күн уота
Миэхэ ууммут сылаас таммаҕа…
Иннибэр – урут көрбөтөх эрээри
Бэркэ эрэнэр кэрэкэ кэмим,
Кэннибэр – көхсүбүн кэҥэтэр
Үөр сылгы кистиирэ. Туйах тыаһа…
Ийэ сиртэн түһүлгэ суола
Халлааҥҥа дабайдар дабайар,
Кулгаахпар суол эрэ дорҕооно:
«Көттөр көтөн иһиэҕиҥ» иһиллэр…
Көрүөхтээхпин көрдүм быһыыта,
Харахпын астым – күн оройо,
Ийэ сирбэр ыллык суол аайы
Саҥа хайысха. Саҥа аллайдым...
-
3
-
0
-
0
-
0
-
0
-
0
