Бу күһүҥҥү кэрэ кэмҥэ биһиги эти-үүтү, бурдугу уонна оҕуруот аһын дэлэтиигэ сыралаһан үлэлиир дьону чиэстиибит. Эһиги үлэҕит түмүгүттэн дойду аграрнай сиэктэрин туруга, ас-үөл өттүнэн хааччыллыыга куттал суох буолуута, тыа сирин социальнай-экэнэмиичэскэй таһыма, күннээҕи олох-дьаһах туруга итиэннэ тыа сирин дьылҕата улахан тутулуктаах.
Быйыл сайын эһиги дьулуургутунан итиэннэ айылҕабыт үчүгэй хараҕынан көрөн, сүөһү дорохой аһылыгын бэлэмнээһин сорудаҕа толорулунна, сиртэн үүнээйини ылыыга үрдүк көрдөрүүлэр ситиһилиннилэр. Өрөспүүбүлүкэ салалтата тыа хаһаайыстыбатын бары салаатын сайыннарыыга ахсаабат кыһамньытын уурар, салааны өйөөһүҥҥэ, үлэлиир-хамсыыр усулуобуйаны тупсарыыга былааннаахтык үлэлиир-хамсыыр.
Ситиһиллибит кирбиини чиҥэтэн, өссө сайыннарар итиэннэ ырыынакка күрэстэһэр кыахтаах, үрдүк хаачыстыбалаах бородууксуйаны оҥорон таһаарыы таһымын үрдэтэр, өрөспүүбүлүкэбитигэр аһылык өттүнэн куттал суох буолуутун хааччыйар сорук турар. Өрөспүүбүлүкэ парламена ситэриилээх былаас уорганнарын кытары аграрнай сиэктэри салгыы өйүүргэ уонна өйөбүл саҥа көрүҥнэрин тобуларга бииргэ үлэлиэхпит. Эһиэхэ уонна эһиги дьиэ кэргэттэргитигэр үлэҕэ саҥа ситиһиилэри, чэгиэн-чэбдик доруобуйаны, бөҕө туруктаах олоҕу баҕарабын.
Ытыктабылы кытары Александр Атласов, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ
-
1
-
0
-
0
-
0
-
0
-
0
