Уопсастыба

Биир үйэттэн ордук саастаах хомсомуол дойду ыччатын иитиигэ сүдү оруолу ылбыта. Саха сиригэр 1921 с. хомсомуол кэккэтигэр киирбит ыччаттар, саҥа Сэбиэскэй былааһы олохтооһуҥҥа олохторун толук ууран охсуспуттара. Хомсомуол үрдүк аатын тыһыынчанан эдэркээн ыччат сүгэн, Аҕа дойду Улуу сэриитигэр аттаммыттара, хорсун быһыылары көрдөрбүттэрэ, өстөөҕү өһөрөн, Кыайыы көтөллөнөн, урусхалламмыт сэлиэнньэлэри, куораттары чөлүгэр түһэриигэ күүскэ үлэлээбиттэрэ.

Хомсомуол кыһатыгар уһаарыллан, үлэ инники кирбиитигэр сылдьыбыттара, үйэ улахан тутууларыгар -- БАМ, АЯМ тимир суолун тутуутугар үлэлээбиттэр. Тыа хаһаайыстыбатын сайдыытыгар тус кылааттарын киллэрсэн, “Оскуола- производство-үрдүк үөрэх” бачыымы өрө тутан, дойдубут чэчирии сайдарыгар олук уурбуттара, кырыс сирдэри баһылаан, саҥа бөһүөлэктэри туппуттара, үөрэх уонна үлэ үөһүгэр бастакы күөҥҥэ сылдьыбыттара.

Албан ааттаах Хомсомуол 105 сылын көрсө, «Таатта Хомсомуола» диэн кинигэ сүрэхтэниитэ И.А. Аргунов аатынан киин библиотека, улуус бэтэрээннэрин сэбиэтин бэрэссэдээтэлэ М.А.Попова уонна оройуон хомсомуолун I сэкирэтээрэ М.А.Ефимова тэрээһиннэринэн, бэтэрээн хомсомуоллар М.Н.Луковцева, С.С.Игнатьева уо.д.а. өйөбүллэринэн, “Сарыал” култуура киинигэр буолан ааста.

Бүтүн улуус хомсомуолун устуоруйатын сырдатар кинигэни Лариса Аввакумова, Лариса Слепцова хомуйан, Алена Аммосова таҥан, редколлегия Михаил Архипов, Саргылана Ючюгяева, Мария Бысыина (Дьохсоҕон нэһилиэгэ), Варвара Решетникова, Полина Кычкина (Октябрьскай нэһилиэгэ), “Тыараһа кыымнара” хаһыат редколлегията (Тыараһа нэһилиэгэ), Елена Аянитова (Дьүлэй нэһилиэгэ), Анна Аргунова, Федора Заболоцкая (Игидэй нэһилиэгэ), Маргарита Егорова, Галина Неустроева, Александра Кустурова (Баайаҕа нэһилиэгэ), Антонина Неустроева, Жульяна Бурцева, Диана Роббек, Анна Кочнева (Алдан нэһилиэгэ), Матрена Самсонова (Хара Алдан нэһилиэгэ), Светлана Винокурова (Уолба нэһилиэгэ), Валентина Блахирова, Надежда Борисова, Татьяна Литвинцева (Орто Амма нэһилиэгэ), Антонина Григорьева (Уус Амма нэһилиэгэ), Феврония Андросова, Клавдия Попова (Амма нэһилиэгэ), Анастасия Тимофеева (Даайа Амма нэһилиэгэ) көмөлөрүнэн сүдү кылаат оҥоһулунна, үйэтитилиннэ.

«Таатта хомсомуола» кинигэ биэс сыл устата архыып докумуоннарынан, улуус хас биирдии нэһилиэгин араас сыллардааҕы хомсомуол хамсааһынын актыыбынай дьонуттан ахтыылаах, 600 сирэйдээх, 60х90 кээмэйдээх, өҥнөөх, элбэх хаартыскалаах, хас да бастаах бэчээтттэнэн таҕыста. Тааттаны аар-саарга ааттаппыт комсомолецтар Дария Миронова, Капитолина Протопопова, Галина Ефимова, Акулина Попова туспа бас буолан, райкомол сэкирэтээрдэринэн үлэлээбит дьоммут галереята, нэһилиэктэринэн, сопхуостарынан актыыбынай комсомолецтар, Алдан нэһилиэгиттэн хас да көлүөнэ Неустроевтар династиялара сырдатылыннылар, уонна куар кодунан видеолар киирэннэр, кинигэни байытан биэрдилэр.

Суолталаах тэрээһиҥҥэ улуус баһылыгын социальнай боппуруоска солбуйааччы С.В.Сунхалыров кинигэни хомуйан оҥорбут  Лариса Аввакумоваҕа, Лариса Слепцоваҕа уонна хомсомуол салайааччыта, бэтэрээнэ Михаил Архиповка “Үйэтитиигэ кылаатын иһин” муниципальнай бэлиэлэри,  дьокутааттар улуустааҕы сэбиэттэрин бэрэссэдээтэлэ П.П.Максимов эҕэрдэ суруктары, сибэкки дьөрбөтүн туттардылар. Таатта комсомолун устуоруйатын үйэтитиигэ үлэлэспит редколлегия чилиэннэригэр Таатта нэһилиэгин баһылыга Егор Павлов, Игидэй нэһилиэгин баһылыга Егор Марков, Уус Амма нэһилиэгин баһылыгын солбуйааччы Петр Колодезников уо.д.а махтал суруктары туттардылар.

Бүтүн Сойуус үрдүнэн ыччаты түмпүт Хомсомуол күнүгэр анаммыт улахан тэрээһин сонуннук ааста, өлбөт-сүппэт матыыптаах ыарыаларынан түмүктэннэ.

Суолдьут сулус оҥостон, хомсомуол кэккэтигэр үлэһит буола үүммүт, төрөөбүт дойдубут сайдарын туһугар олохторун, үлэлэрин анаабыт көлүөнэҕэ махтанабыт!