Бырагыраама чэрчитинэн, 35-гэр диэри саастаах, табаны иитиигэ биэс сылтан итэҕэһэ суох үлэлээбит эдэр табаһыт 1 мөл. солк. суумалаах социальнай төлөбүрү ылан, олорор усулуобуйатын тупсарарга – дьиэ туттарга биитэр атыылаһарга, ол иһигэр ипотекаҕа туһанар. Ирдэбил быһыытынан, маннык көмөнү эдэр табаһыт биирдэ эрэ ылар уонна өссө биэс сыл салааҕа үлэлиэхтээх.
«Эдэр табаһыт» бырагырааманан 2020 сыллаахха өрөспүүбүлүкэ бүддьүөтүттэн 11 мөл. солк., 2021 сыллаахха – 20 мөл., 2022 сыллаахха – 20 мөл. солк. көрүллүбүтэ, 2023 сыллаахха кыайан көрүллүбэтэҕэ. Быйыл 28 мөл солк көрүлүннэ.
Бырагыраама бастаан Аартыка зонатыгар эрэ үлэлээбитэ, хаһаайыстыбалар туруорсууларынан, 2021 сылтан табалаах улуустарга барыларыгар тарҕаммыта. Инньэ гынан, бырагыраама үлэҕэ киириэҕиттэн Алдан, Анаабыр, Аллараа Халыма, Булуҥ, Кэбээйи, Муома, Нерюнгри, Өймөкөөн, Өлөөн, Томпо, Усуйаана, Үөһээ Халыма, Эбээн Бытантай уонна Эдьигээн улуустарын хаһаайыстыбаларыгар үлэлии-хамсыы сылдьар 51 эдэр табаһыт өйөбүлүнэн туһаммыта.
Саха Өрөспүүбүлүкэҕэ таба ахсаанын элбэтиигэ, уопсайынан таба салаатыгар дойду үс бастыҥ көрдөрүүлээх эрэгийиэнигэр киирсэр. Кэлиҥҥи биэс сылга өрөспүүбүлүкэҕэ таба ахсаана эрэллээхтик эбиллэн, 170 тыһыынчаҕа тиийдэ диэн Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэр.
Хаартыска интернет ситимиттэн
-
0
-
0
-
0
-
0
-
0
-
0
