Отчуоту бас билэр баайга-дуолга уонна сиргэ сыһыаннаһыы миниистирэ Павел Багынанов салайар бөлөҕө туруорар. Бөлөх састаабыгар Ил Түмэн дьокутаата, «Саханефтегазсбыт» хампаанньа генеральнай дириэктэрин солбуйааччы Николай Кульбертинов, инновация, сыыппара сайдыытын уонна инфокоммуникационнай технология миниистирин солбуйааччы Андрей Суслов, «Якутлесресурс» ГАУ салайааччыта Виктор Омуков уонна улуус дьаһалтатын, тэрилтэлэрин салайааччылара, исписэлиистэрэ үлэлииллэр.
Бэҕэһээ отчуоттуур мунньах Маалыкааҥҥа уонна Саҥыйахтаахха ыытылынна. Олохтоохтор элбэх ыйытыылары биэрэн, толору хоруйу ылан астыннылар, кэпсэтиигэ көхтөөхтүк кытыннылар. Маалыкааҥҥа киин ититэр ситим үлэтин, сибээһи уонна сайыҥҥы уу суолун тупсарыы, тэрээһиннээх хаһаайыстыба үлэһиттэрин хамнаһа тардылларын туһунан этилиннэ.
Саҥыйахтаахха отчуоттуур бөлөх чилиэннэрэ АЗС-ка, оскуолаҕа уонна ФАП-ка сырыттылар, үлэ кэлэктииптэрин кытары көрүстүлэр. Олохтоохтор саҥа оскуола тутуутун туруорустулар. Ол барыта боротокуолга килэрилиннэ. Отчуоттуур мунньахтар улуус бары нэһилиэнньэлээх пууннарын хабан ыытыллыахтара, Түмүк мунньах олунньу 22 күнүгэр улуус киинигэр, Өлүөхүмэ куоратыгар, буолуоҕа диэн Бас билэр баайга-дуолга уонна сиргэ сыһыаннаһыы министиэристибэтэ иһитиннэрэр.
-
0
-
0
-
0
-
0
-
0
-
0
