Кулун тутар 18 күнүгэр РФ Федеральнай Мунньаҕын эрэгийиэннээҕи бэлиитикэҕэ уонна олохтоох бэйэни салайыныыга  кэмитиэтин мунньаҕар Владимир Прокопьев баайга-дуолга тиэхиньиичэскэй усулуобуйа баар буоллаҕына, булгуччулаах докумуоннары күүһүрдүллүбүт  квалифицированнай элэктириэннэй илии баттааһынынан бигэргэтэр туһунан федеральнай сокуоҥҥа эбиилэри киллэрии наадатын ыйда.

Владимир Прокопьев кэмитиэт бэрэссэдээтэлигэр Алексей Диденкоҕа уонна Госдуума дьокутааттарыгар туһаайан Саха Сирин парламена киллэрбит федеральнай сокуон бырайыага судаарыстыбаннай бас билиигэ баар эбийиэктэри муниципальнай бас билиигэ биэрии хаамыытын түргэтитэр уонна судургутар сыалтан оҥоһуллубутун бэлиэтээтэ.

«Билиҥҥи туругунан бас билиигэ биэрии аахталара кумааҕы көрүҥүнэн почтанан ыытыллаллар. Сороҕор бу бырассыас уһун кэми ылар, ордук хотугу, ол иһигэр Аартыка нэһилиэктэригэр докумуону ыытыы. Почта сибээһин туһаныы эбии үп ороскуотун эрэйэр», - диэтэ Ил Түмэн сис кэмитиэтин бэрэссэдээтэлэ.

Парламентарий этэринэн, федеральнай сокуоҥҥа эбиилэри киллэрии бас билиигэ биэрии аахталарын элэктириэннэй илии баттааһыны туһанан илии баттыырга кыаҕы биэриэ. Бу баайы-дуолу федеральнай бас билииттэн эрэгийиэннэргэ эбэтэр муниципалитеттарга, эрэгийиэн бас билиититтэн федеральнай эбэтэр муниципальнай бас билиигэ, муниципальнай бас билииттэн федеральнай эбэтэр эрэгийиэн бас билиитигэр биэрии үлэтин суһаллык толорору хааччыйыа.

«Биһигини элбэх докумуоннаах улахан үлэ күүтэр. Онуоха, киллэрэр аныгылыы уларытыыларбыт үлэни суһаллык уонна кыра ороскуоттаахтык толорорго көмөлөһүөхтэрэ. Ил Түмэн Госдуумаҕа киллэрэр сокуонун барыла ороскуоту кыччатарга, баайы-дуолу бас билиигэ биэрэри түргэтитэргэ уонна судургутарга туһаайыллар», - диэтэ Владимир Михайлович.

Дьүүллэһии кэнниттэн кэмитиэт бу сокуон барылын бастакы ааҕыыга ыларга Судаарыстыбаннай Дуумаҕа сүбэлээтэ.

Иһитиннэрии уонна хаартыска: Ил Түмэн пресс-сулууспата