Николай Рязанскай арылыйа устар ыраас уулаах кыыс Амма быйаҥнаах сириттэн төрүттээх. Ону туоһулаан быыстапката «Кустук тахсар Аммабар» диэн ааттаах.
Николай Николаевич бэйэтин айар суолун-ииһин булбут худуоһунньук. Кини үлэлэрэ норуот тапталын ылыан ылан, биһигини куйаар ситиминэн хас саҥа күн сарсыардатыгар уруйдаан-айхаллаан көстөллөр.
Хартыына галереятын саалатын тула ыйаммыт үлэлэригэр, Сахабыт сирин маанылаах айылҕата, саха киһитин күннээҕи түбүгэ, норуот быһыытынан итэҕэлбит, үгэспит Олоҥхонон дьүһүйүллэр.
Николай Николаевич Арассыыйа Худуоһунньуктарын айар сойууһун чилиэнэ. Кини ойуулуур-дьүһүннүүр ускуустубаны тарҕатааччы, киэҥ эйгэҕэ биллэрээччи быһыытынан, тус быыстапкаларын Ойуу-дьүһүн өрөспүүбүлүкэтээҕи бас түмэлигэр, «Үргэл» арт-галереяҕа, төрөөбүт дойдутугар, Горнай, Үөһэ Бүлүү уо.д.а. улуустарыгар, Москуба, Санкт-Петербург куораттарга туруорбута. Бу ситимнээх үлэ, кинини, талааннаах худуоһунньук, олоҕу үйэтитээччи быһыытынан көрдөрөр.
«Кустук тахсар Аммабар» быыстапка кулун тутар 26 күнүттэн муус устар 7 күннэригэр диэри ойуулуур-дьүһүннүүр ускуустуба сэҥээрээччилэрин үөрүүтүгэр үлэлиэҕэ.
Николай Николаевичка ытык Таатта сааскы ыраас салгына, айар үлэтигэр саҥа долгуну, умуллубат иэйиини, үтүмэн үтүө санааны үөскэттин. Баҕарабыт айымньылаах үлэни, элбэх сэҥээрээччини, табыллыыны, ситиһиини!
-
10
-
1
-
0
-
0
-
0
-
0
