Бу туһунан СӨ култуураҕа уонна духуобунай сайдыыга миниистирэ Афанасий Ноев телеграм-ханаалыгар иһитиннэрдэ. Саха Сиригэр уон судаарыстыбаннай уонна биир муниципальнай тыйаатыр айымньылаахтык үлэлииллэр. Кинилэр хас биирдиилэрэ култуура нэһилиэстибэтигэр сүдү кылааты киллэрэллэр. Бу күн тыйаатыр уораҕайыгар испиктээктэри уонна араас дьаһаллары тэрийэргэ күннэтэ үлэлиир-хамсыыр бары үлэһиттэри, артыыстары, режиссердары, сценографтары, звукорежиссердары, о.д.а. «көстүбэт боруон байыастарын» бэлиэтиир тоҕоостоох.
«Биһиги тыйаатырдарбыт эрэгийиэн таһыгар биллэллэринэн, аан дойдуга үрдүк сыанабылы ылалларынан киэн туттабыт. Бу сылга өрөспүүбүлүкэ түөрт тыйаатырын испиктээктэрэ Арассыыйатааҕы тыйаатыр туруоруутун Көмүс пуондатыгар киирдилэр. Ол курдук, Олоҥхо тыйаатырын, П.А. Ойуунускай аатынан Саха академическай тыйаатырын, Д.К.Сивцев-Суорун Омоллоон аатынан опера уонна балет тыйаатырын, Хотугу сир төрүт олохтоох аҕыйах ахсааннаах норуоттарын тыйаатырын испиктээктэрэ үрдүк ситиһиилэннилэр.
Тыйаатыр уонна ускуустуба – киһи духуобунай баайын сайдыыта. Аан дойду устуоруйатын, култуурабытын кэрэһэлиир биир сүрүн хайысхабыт, тыйаатыр эйгэтэ чэчирии сайдарыгар баҕарабын!», - диэтэ миниистир.
Хаартыска: https://t.me/afanasiy_noev
-
0
-
0
-
0
-
0
-
0
-
0
