Чурапчы, Уус Алдан, Мэҥэ Хаҥалас, Хаҥалас, Ньурба, Сунтаар, Бүлүү, Үөһэ Бүлүү, Нам, Таатта улуустарыттан уонна Дьокуускай куораттан хорсун санаалаах, күүстээх мотуор эрийэ тыаһыыр массыыналардаах эр бэртэрэ уонна кэрэ аҥардар хамаандалара кыттыыны ыллылар.
«Хаар айан» кэнники сылларга үгэскэ кубулуйан, элбэх сэҥээрээччилэри тардан, халыҥ хаары хайыта сүүрэр күрэс тэнийиэн тэнийдэ. Массыына көлө түргэн сырыытын айанын, күрэс барыытын Таатта улууһун «Хаар айаҥҥа» бэрэстэбиитэлэ уонна «Автокулууп» салайааччыта Мичил Харитонов сырдатта. – Таатта улууһуттан түөрт экипаж инжектор кылааска кытынна: өрөспүүбүлүкэ икки төгүллээх чөмпүйүөнэ «Форвард» экипаж (пилот Петр Васильев, штурман Григорий Эльберяков), «Гром» экипаж (пилот Вячеслав Винокуров, штурман Майкл Ефремов), «Хантер» экипаж (пилот Евгений Большаков, штурман Алексей Никифоров), «Акула» автоледи экипаж (пилот Ньургуяна Павлова, штурман Оксана Андреева).
Бастакы күҥҥэ ыытыллыбыт сүүмэрдээһин кэнниттэн финалга 15 экипаж, ол иһигэр биһигиттэн «Гром» уонна «Хантер» киирбиттэрэ. «Форвард» хамандыыра Петр Васильевка «Хаар айан» чөмпүйүөнүн анал бэлиэтэ, ону тэҥэ Арассыыйа автоуспуордун I разряда туттарылынна. Үс түһүмэх түмүгүнэн, «Гром» экипаж (пилот Вячеслав Винокуров, штурман Майкл Ефремов) тоҕус очукуону ылан, кыайыы өрөгөйүн билэн, үөрүүлэрэ үрдээтэ. Оттон улууспутугар бастакы кыһыл көмүс мэтээли автоледиларга «Акула» экипаж (пилот Ньургуяна Павлова, штурман Оксана Андреева) аҕалла. Ол курдук, алта экипажтан 1000 миэтирэҕэ биэтэккэ бастакынан кэлэн, муҥутуур кыайыылааҕынан ааттанна.
Быйылгы чөмпүйэнээккэ инжектор кылааска таатталар төрдүс төгүлүн чөмпүйүөннээтилэр. Бу ситиһии тиэхиньикэнэн успуорт улууспутугар тэнийбитин, сайдыбытын туоһулуур. Ханнык баҕарар тэрээһин, күрэхтэһии өйөөччүлэрдээх, көмөлөһөөччүлэрдээх буолар. Биһиги хамаандаларбытыгар өйөбүл буоллулар биир дойдулаахтарбыт: «ЭкспертТелеком» (сал. Евгений Керемясов), «Мясной двор» (сал. Айаал Макаров), «Тааттаавтодор» (сал. Иван Бочонин), ОДьКХ СУТ Тааттатааҕы салаата (сал. Василий Будикин), Таатта нэһилиэгэ (баһылык Егор Павлов), Уус Амма нэһилиэгэ (баһылык Егор Васильев), Даайа Амматын нэһилиэгэ (баһылык Степан Собакин), «Учур» маҕаһыын (сэб. Юрий Большаков), «Аллан» маҕаһыын (Никита Винокуров), «Ласковый май» маҕаһыын (Константин Халыев). Кинилэргэ сүгүрүйэн туран, махтанабыт.
Күүстээх санаалаах экипажтарбытыгар хаар аргыстаах ситиһиилээх айаны, кыайыыны-хотууну баҕарабыт! Өрүүтүн да Тааттаҕыт аатын ааттата турун диэн баҕа санаа бастыҥын аныыбыт!
Хаартыскалары ааптар хааччыйда
-
1
-
0
-
0
-
0
-
0
-
0
