1-кы тииптээх спиноцеребеллярнай атаксиялаах уонна атын нейродегенеративнай ыарыылаах ыарыһахтар ассоциацияларын «Биһиги күүспүт - сомоҕолоһууга» бырайыага генетическэй ыарыылар тарҕаныыларын намтатыыга туһуламмыт.
Быраастар Орто Халыма, Арҕахтаах, Ойуһардаах уонна Сылгы-Ытар олохтоохторун көрдүлэр, ДНК-анаалыстарын оҥордулар, 318 сүбэни биэрдилэр, 5 ультразвуковой пренатальнай чиничийии ыыттылар.
Саха научнай киинин килииникэтигэр киирэргэ 25 ыарыһах ыҥырылынна. Ону таһынан медиктэр нэһилиэнньэҕэ профилактическай лекциялары ыыттылар, итиэннэ нэһилиэктэргэ уонна Орто Халыма киин балыыһатыгар үлэлиир кэлиэгэлэригэр методическай уонна практическай көмөнү оҥордулар.
«Сахалар ойдом олороллорун быһыытынан, генетическэй ыарыылар балачча үрдүк таһымнаахтар. Сүрүн кыһалҕа, ыраах нэһилиэктэргэ олорор удьуорунан бэриллэр ыарыылаах дьон, ордук ыарыыны эрдэ быһаарарга, оройуон киинигэр туһаайыы ылаллара уонна Дьокуускай куоракка генетическэй чинчийиигэ эбэтэр диагноһы верификацияҕа кэлэллэрэ кыаллыбат. Биһиги эспэдииссийэбит бу чинчийиилэри миэстэтигэр ыытарга уонна ыарыһахтарга кэмигэр көмө оҥорорго туһалаах», - диэн Ассоциация бэрэссэдээтэлэ Оксана Сидорова үллэһиннэ.
«Биһиги күүспүт - сомоҕолоһууга» бырайыак иитинэн барыта 17 эспэдииссийэ тэрилиннэ. Маныаха, 4150 киһи тустаах исписэлиистэртэн көмө ыллылар.
Иһитиннэрии уонна хаартыска: СӨ Ил Дарханын уонна Бырабыыталыстыбатын пресс-сулууспата
-
0
-
0
-
0
-
0
-
0
-
0
