Уопсастыба

Манна былыргы мал-сал көрдөрүүгэ турда. Устуоруйаттан кэпсиир буоллахха, Орто Амма нэһилиэгин бочуоттаах олохтооҕо, Саха Өрөспүүбүлүкэтин уус-уран оҥоһуктарын маастара, Таатта улууһун норуотун маастара, удьуор иистэнньэҥ Анна Викторовна Афанасьева эбэтэ Анна Сергеевна Васильева (1892 с.т.) сүүс сыл анараа өттүгэр таарбаҕан тириититтэн тикпит андаатар саҕалаах соно уонна маллаах иһитэ элбэҕи кэпсиир.

Биир дойдулаахпыт, саха норуодунай суруйааччыта Николай Егорович Мординов -- Амма Аччыгыйа «Сааскы кэм» арамааныгар Анна Сергеевна уонна Артемий Семёнович Васильевтар прототиптара кэпсэнэр. 2016 сыллаахха Арассыыйаҕа Киинэ сыла биллэриллибитэ. Онно сөп түбэһэн «Сахафильм» хампаанньа «Сааскы кэм» арамааҥҥа олоҕуран, «Биһиги билбэтэх оҕо сааспыт» диэн киинэ уһуллубута (режиссёр Алексей Романов).

Бу киинэҕэ урукку кэминээҕи таҥас-сап наада буолбутугар, Анна Викторовна эбэтин сонун уларсыбыта. Ону Лэглээриннэр ийэлэрин Сөдүөччүйэни оонньообут Үүнэр көлүөнэ тыйаатырын артыыската Сардаана Вырдылина кэппитэ. Ол кэмнээҕи сон, саха дьонун өрөбөлүүссүйэ иннинээҕи олоҕун-дьаһаҕын тыынын биэрдэҕэ. Манна даҕатан билиһиннэрдэххэ, Анна Сергеевна эдьиийэ Татьяналыын (саха норуодунай поэта Эллэй ийэтэ) Балапаат Сиипсэпкэ бууктаах сон тикпиттэрэ уос номоҕо буолан кэпсэнэр, сурукка суруллар.

Ульяна Петровна Гузаирова быыстапкаҕа туруорбут малын устуоруйа эмиэ дириҥ. Эһэлэрэ Халыев Демьян Фёдорович ийэтэ Иустинья Степановна Халыева (1873 с.т.) ырбаахытын тимэҕин Уодай уустара 1909 сыллаахха үрүҥ көмүс харчынан оҥорбуттар. Гузаировтар эбэлэрэ Елизавета Николаевна дэгиттэр ырыаһыт, үҥкүүһүт, эдэр сааһыттан уус-уран самодеятельность көхтөөх кыттыылааҕа эбит. Кини 1938 сыллаахтан кэппит түбүтүөйкэтэ бэркэ харайыллыбыт.

Быыстапкаҕа В.П.Дайбаннырова эбэтин Пелагея Михайловна Бястинова ыаҕайата, Г.П.Дедюкина аҕатын Петр Гаврильевич Колотинскай талкыта, Н.Н.Местикова ийэлэрин Анна Ивановна Платонова дьэҥкир иһиттэрэ, А.Д.Ючюгяева төрөппүттэрэ ыал буолалларыгар, эбэтэ Евдокия Михайловна биэрбит иһит-хомуоһа, Т.И.Литвинцева эбэтин Анастасия Яковлевна Посельская күөрчэхтиир кытыйата. Мария, Күннэй Корякиналар өбүгэлэрин Баай Балапааттар кэмпиэт хаатын иһитэ, Е.Т Протопопова ийэтэ Анна Матвеевна Ощепкова кыраһыын лаампата, С.В.Башарина ийэтин Мария Васильевна Чиряева кыптыыйа, былаата киэҥ сэҥээриини ыллылар.

В.В. Протопопов эһэтин Николай Тимофеевич Протопопов кытыйатын сиэдэрэй ойууларын уһанарыгар туһанар эбит.

Дьэ ити курдук, түмэлгэ баай устуоруйалаах элбэх мал-сал хомуллан туруорулунна. Онон, оскуола үөрэнээччилэрэ элбэх кэрэхсэнэр кэпсээни иһиттилэр. Хас биирдии ытык мал устуоруйатын биллилэр. Олус астынан тарҕастылар.

Хаартыскаҕа ааптар түһэриитэ.