Уопсастыба

Куонкурус көҕүлээччитинэн Елена Ивановна төрөппүт кыыһа Марфа Харайданова, тэрийээччилэринэн хартыына галереята, Алампа аатынан Дьохсоҕон Норуот айымньытын дьиэтэ, Бырааттыы Мординовтар ааттарынан мусуой уонна худуоһунньук-оформитель дьиэ кэргэнэ буолла. Елена Харайданова кырааска өҥүн дьэрэкээн дьүһүннэринэн киэргэммит дьоллоох олоҕу олорон ааспыта. Күөх Ньурба кыыһа Таатта уола Николай Харайдановтыын харахтарынан хайҕаһан, сүрэхтэринэн таптаһан ыал буолан, уоллаах кыыс оҕолонон, Дьохсоҕон сиригэр олохсуйбуттара. Алгыстаах Таатта сирэ худуоһунньук кыыс айар үлэтигэр ымыы буолан айылҕаттан бэриллибит талаанын чочуйан, күүһүрдэн биэрбитэ. Бу айар үлэтэ барыта иккис төрөөбүт дойду оҥостубут Дьохсоҕонугар анаммыта. Худуоһунньук-оформитель быһыытынан Дьохсоҕонун гербэтин оҥорбута, нэһилиэк пааркатын, кулууп дьиэ, ыһыах тэрээһиннэрин уо.д.а. киэргэтиитигэр элбэх үлэни ыыппыта. Биир үйэлээх үлэтинэн Алампа уобараһын, Дьохсоҕон дьоһун дьонун, быраатты Мординовтар мэтириэттэрин уруһуйдаан хаалларбыта буолар. Кини үлэлэрэ улуустааҕы хартыына галереятыгар, бырааттыы Мординовтар мусуойдарыгар уонна айар кутун туттарбыт Алампатын аатын сүгэр Норуот айымньытын дьиэтигэр, худуоһунньук сылаас тыынынан илгийэ тураллар. Куонкуруска улуус уруһуйдьуттара, оскуола үөрэнээччилэрэ, олохтоохтор кытыннылар.

Куонкурус Елена Ивановна сөбүлээн уруһуйдаабыт пейзаж уонна мэтириэт көрүҥнэригэр ыытылынна. Айылҕаны ойуулааһыҥҥа оҕолорго бастаатылар: I миэстэ – Нарыйаана Кривошапкина,  "А.Е.Кулаковскай-Өксөкүлээх Өлөксөй искибиэрэ", гуашь. II миэстэ – Албан Бысыин, акварель. III миэстэ – Сайаана Харлампьева, «Ньургуһуннар», гуашь. Биһирэм бирииһинэн бэлиэтэннилэр: Евдокия Уварова, Сандаара Потапова.

Мэтириэти уруһуйдааһыҥҥа оҕолорго бастаатылар: I миэстэ – Диана Васильева, «Анна Денисовна Неустроева», харандаас. II миэстэ – Ларина Власова, «Димитриан Попов», холуста, арыы. III миэстэ – Диана Слепцова, «Арассыыйа дьоруойа Родимир Максимов», харандаас. Биһирэм бирииһинэн бэлиэтэннилэр: Албан Бысыин, Лилиана Семенова.

Айылҕаны ойуулааһыҥҥа анал идэлээх дьоҥҥо бастаатылар: I миэстэ – Алена Протодьяконова, «Баайаҕа үрэҕэ», акрил, холуста. II миэстэ – Марина Аввакумова, «Преображенскай сиэркэп», арыы, холуста. III миэстэ – Надежда Николаева, «Таатта төрдө», холуста, арыы.

Улахан дьоҥҥо: II миэстэ – Любовь Луковцева, «Кыра Имил Дьимил», холуста, акрил. III миэстэ – Мария Слепцова, «Түөрт сэргэ», акварель. Мэтириэти уруһуйдааһыҥҥа I миэcтэ – Лиана Данилова, «Норуот маастара Ф.И.Чярин», холуста, акрил. II миэстэ – Виктория Бысыина, «Е.И. Харайданова», харандаас. III миэстэ – Надежда Николаева, «Дойду ахтылҕана», хортуон, арыы.

Куонкуруска хайдах кыттыбытын туһунан Мария Слепцова маннык кэпсээтэ:

– Улуу Кыайыы 80 сылын өрөгөйүгэр үс Амма олохтоохторо түмсэн, Амма эбэ үрдүгэр, Аартыкка, хорсун-хоодуот дьоннорун уоттаах сэриигэ атаарбыттара. Ытык сиргэ Мэҥэ таас өйдөбүнньүгү туруорбуттара. Үс Амма сириттэн 136 киһи сэриигэ барбытыттан, үгүстэрэ сэрии толоонугар хаалбыта. Кэлэр кэнчээри ыччакка аҕа көлүөнэ Албан ааттаах суолун үйэлэргэ хаалларыы биһиги барыбыт иэспит. Бу күн «Түөрт сэргэ» диэн хоһоон айыллан тахсыбыта.Тааттатааҕы хартыына галереятыгар талааннаах худуоһунньук-оформитель сырдык кэриэһигэр тэриллибит күрскэ хоһооммун ойууга тиһэн, кыттарга санаммытым. Харахпар киэҥ Аммам, түөрт сэргэ, Мэҥэ таас, Аартыкка тэрээһин көстөн кэлбитэ. Бу курдук «Түөрт сэргэ» уруһуйум бэйэтинэн уруһуйданан тахсыбыта. Оттон Диана Слепцова Арассыыйа Дьоруойун Родимир Максимовы уруһуйдаабыта.

Үөрүүлээх тэрээһиҥҥэ худуоһунньук олоҕун аргыһа Николай Серафимович, оҕолоро, сиэннэрэ, аймахтара, олохтоохтор, Елена Ивановна олоҕун, айар үлэтин тула кэпсээтилэр, инникитин да маннык куонкурус ыытылларыгар баҕардылар. Бу курдук Таатта улууһун, Дьохсоҕон нэһилиэгин сайдыытыгар улахан кылааты киллэрсибит, чараас дууһалаах ийэ, эбэ, кэрэ киһи олоҕо айар үлэ нөҥүө салҕаннын.

Хаартыскалары ааптар хааччыйда.