Тыа хаһаайыстыбатын уонна ас-үөл бэлиитикэтин министиэристибээ иһитиннэрэринэн, өрөспүүбүлүкэ үрдүнэн, бас билии көрүҥүттэн тутулуга суох, быйыл сааскы ыһыы үлэтэ 51 100 тыһыынча гектар иэннээх бааһынаҕа ыытыллар. Көрүҥнэринэн ыллахха, 11 861 гектарга бурдук, 31 600 гектарга сүөһү сиир култуурата ыһыллар, 6 266 гектарга хортуоппуй уонна 1 258 гектарга оҕуруот аһа (44,4 гектарга хаппыыста, 97,8 гектарга моркуоп, 59,2 гектарга сүбүөкүлэ, 35,3 гектарга араас култуура) олордуллар.
Кэнники сылларга бааһына иэнин кэҥэтии үлэтэ утумнаахтык ыытыллар. Ол тэтим быйыл даҕаны кэһиллибэтэ. Ааспыт сылы кытары тэҥнээн көрдөххө, бурдук ыһыыта 800, сүөһү сиир култууратын ыһыыта 700, хортуоппуйу олордуу 200, оҕуруот аһын олордуу 100 гектарынан кэҥэтиллибит. Дьэ бу ыһыыттан аны күһүн баалабайынан 12 100 туонна бурдугу, 74 800 туонна хортуоппуйу уонна 28 700 туонна оҕуруот аһын хомуйар сорук турар.
Ыһыы сиэмэтин хааччыйарга «Туймаада ҮАПК» аахсыйалаах уопсастыба уонна «Якутагротрейд» хааччахтаммыт эппиэтинэстээх тэрилтэ үлэлииллэр. Ыам ыйын 30 күнүнээҕи туругунан, кинилэр 815 туонна бурдук сиэмэтин (85 %), 1 706 туонна сүөһү сиир култууратын сиэмэтин (83 %), итиэннэ 627 туонна минеральнай уоҕурдууну (90 %) соҕурууттан аҕалан, тустаах хаһаайыстыбаларга тиэрдибиттэр. Маны таһынан 1 246 туонна сиэмэ хортуоппуйу хааччыйарга дуогабардаспыттарыттан 73 %-ын, эбэтэр 825 туоннаны аҕалан тиксэрбиттэр. Уу суола аһылынна, онон хаалбыт сиэмэ, уоҕурдуу бу күннэргэ аҕалыллыахтаах, сороҕо айаннаан иһэр.
Быйыл дьыл эрдэлээн кэлэн, хаһаайыстыбалар сир куурарынан көрөннөр, сиик саптарыытын ыам ыйын бастакы күннэриттэн саҕалаабыттара, ыһыыга сүрүннээн ыам ыйын 18-19 күннэриттэн киирбиттэрэ. Инньэ гынан, Дьокуускай куорат таһынааҕы хаһаайыстыбалар бурдугу 423 гектарга ыһаннар, былааннарын 106 % толордулар. Билигин сүөһү сиир култууратын ыһыытыгар түһүннүлэр. Барыта 1 556 гектарга үлэлииллэр.
Атын улуустар хаһаайыстыбалара эмиэ бурдуктарын ыһыытын түмүктээн, сүөһү сиир култууратын ыһа сылдьаллар.
-
0
-
0
-
0
-
0
-
0
-
0
