Федерация Сэбиэтин Бэрэссэдээтэлэ Валентина Матвиенко пуорум пленарнай мунньаҕын арыйарыгар, тыа сиригэр араас тутуу ыытылларыгар маннык түһүлгэлэр улахан оруоллаахтарын, киирэр этиилэр болҕомтоҕо ылыллан, хамсааһын тахсарын эттэ. «Бу пуорум түмүгүнэн, биэдэмистибэлэргэ уонна эрэгийиэннэр салалталарыгар эмиэ сорудахтар бэриллиэхтэрэ, ону толорууну хонтуруоллуохпут», – диэтэ.
«Арассыыйа тыата: билиҥҥитэ уонна кэскилэ» сиэссийэҕэ тыа хаһаайыстыбатын миниистирин солбуйааччы Ксения Шевелкина тыа сирин сайыннарыыга туһуламмыт дьаһаллар тустарынан сырдатта. «Тыа сирин кэлимник сайыннарыы» бырагыраама олох бары эйгэтин киэҥник хабан үлэлиирин, каадыры бэлэмнээһин оскуолаттан саҕалаан ыытылларын, Бэрэсидьиэн сорудаҕынан, Үөрэх министиэристибэтин кытары «Агропрофессионалитет» бырагыраама оҥоһулларын кэпсээтэ. Федерация Сэбиэтин аграрнай бэлиитикэҕэ уонна айылҕаны туһаныыга кэмитиэтин бэрэссэдээтэлэ Александр Двойных билигин үгүс дойдуларга аһылык кыһалҕата турбутун эттэ, баай сирдээх-уоттаах, 40 мөлүйүөн гектары туһаҕа таһаарар кыахтах Арассыыйа аан дойду ырыынагар сүрүн оонньооччу буолан эрэрин бэлиэтээтэ.
Пуорум стратегическай сиэссийэлэрин, төгүрүк остуолларын Федерация Сэбиэтин чилиэннэрэ иилээн-саҕалаан ыыттылар. Ол курдук, социальнай бэлиитикэ кэмитиэтин чилиэнэ Анастасия Жукова салайбыт төгүрүк остуолугар тыа сирин олоҕор, тыа хаһаайыстыбатын идэтигэр, үлэтигэр-хамнаһыгар интэриэһи үөскэтэргэ, манна бисиинэһи тэрийиэххэ сөбүн туһунан өйдөтөргө итиэннэ туох саҥа технологиялар баалларын туһуна сырдатарга агроблогердары тардар туһунан кэпсэтии барда.
Эмиэ бу кэмитиэт чилиэнэ Мохмад Ахмадов салайбыт төгүрүк остуолугар быйылгыттан үлэтин саҕалыыр «Земскэй тренер» бырагыраамаҕа тирэҕирэн, тыа сиригэр маассабай успуорду сайыннарарга, успуорт эбийиэктэрин тутууга, успуорт тэриллэринэн хааччыйарга күүскэ үлэлиир сорук туруорулунна.
Аграрнай бэлиитикэҕэ уонна айылҕаны туһаныыга кэмитиэт чилиэнэ Александр Наролин салайбыт төгүрүк остуола каадыры бэлэмнээһиҥҥэ ананна. АПК-ҕа аныгы технология күүскэ киллэриллэринэн, үрдүк категориялаах исписэлиистэр наадалара, генетикаҕа, селекцияҕа, биотехнологияҕа, агрономияҕа, үлэ тиэхиньикэтин оҥорон таһаарыыга билим үлэһиттэрин кэлимник бэлэмнээһин ирдэнэрэ этилиннэ. Бу туһунан Федерация Сэбиэтин саайта суруйар.
-
0
-
0
-
0
-
0
-
0
-
0
