Уопсастыба

Бэҕэһээ кырдьаҕас Чөркөөххө Саха сирин үрдүнэн саха олоҕун-дьаһаҕын, ытык Тааттаҕа политсыыльнайдар сабыдыалларынан үөрэх-билии тарҕаммытын көрдөрөр бастакы аһаҕас халлаан анныгар турар политсыылка уонна улуу убайбыт Былатыан Ойуунускай аатынан Судаарыстыбаннас түмэллэригэр сылдьыбыта. Өрөмүөн хайдах бара турарын көрбүтэ-истибитэ.

Бүгүн   Афанасий Ноев улуус киинигэр сарсыарда 9 чаастан “Манчаары оонньууларын”  сүрүн туруорааччытын, биир дойдулаахпыт Роман Дорофеевтыын Таатта улууһун баһылыгын Айаал Бурцевы,  дьокутааттар улуустааҕы мунньахтарын бэрэссэдээтэлэ Петр Максимовы кытары  көрүстүлэр. Кэпсэтии Оонньуулары тэрийии, ыытыы тула барда.

Салгыы култуура исписэлиистэрин кытары Норуот айымньытын, муниципальнай архыып  уонна  “Таатта”  литературнай-художественнай түмэл-заповедникка үлэни-хамнаһы билсэ, биир ыйга тиийбэт кэминэн саха төрүт көрүҥнэригэр ыытыллар XXII “Манчаары оонньууларын”  хаамыытын билистэ, биир идэлээхтэрин кытта ирэ-хоро кэпсэттэ.

Миниистир салгыы Аан дойдутааҕы архыыптар күннэринэн, баай пуондалаах Таатта архыыбын исписэлиистэрин Лариса Слепцованы уонна Мария Ефимованы кытары көрүстэ, ВКС нөҥүө  Амма улууһун дьаһалтатын кытары архыып туһунан мунньахха кытынна. Эҕэрдэлээтэ.

Таатта архыыбыгар саха дьиҥ олоҕун суруйбут алаас уола Алампа, бастакы олох-дьаһах хаһаайыстыбатын наркома Ананий Андреев, сахалартан бастакы философскай наука доктора, пединститут бастакы ректора Авксентий Мординов төрөөбүт миитэрэпкэлэрин, 1827-1843 сс. Боотуруускай улуус II Игидэй нэһилиэгин сирин биэдэмэһин, Таатта улууһун тэриллиитин туһунан 1931-1933 сс. Ноҕоруодап  алпабыытынан  суруллубут оройуон ситэриилээх кэмититэтин мунньаҕын боротокуолларын, 1937 с. П.А.Ойуунускай оройуон сэбиэтин дьокутааттарын пленумугар кыттыыны ылбыт мунньаҕын боротокуолун көрөн сөхтө-махтайда.

-- Ытык Таатта саха тылын, төрүт үгэһин киинэ, Олоҥхо маанылаах дойдута. Төрөөбүт тылбыт нөҥүө өбүгэ сатабыла, култуурата, итэҕэлэ ситимнэнэн сайдар. Дойду Бэрэсидьиэнэ Владимир Путин авар улуу бэйиэтэ Расул Гамзатов төрөөбүт күнүгэр, балаҕан ыйын 8 күнүн, Арассыыйа норуоттарын тылын күнүнэн бигэргэттэ. Төрөөбүт тыл күүһүнэн, омукпут үгэһинэн тэриллэр үйэлээх тэрээһиннэр сайда, ыытылла туруохтара, -- диэн тылларынан Афанасий Ноев талба-талыы Тааттаҕа бэҕэһээҥҥи-бүгүҥҥү үлэтин түмүктээтэ.