Оннук түмсүүлэртэн биирдэстэринэн Александр Протодьяконов салайар «Айгы ситимэ» диэн түмсүү буолар. Үлэлээбитэ үһүс сылыгар барбыт түмсүү өрөспүүбүлүкэ араас улуустарыгар олорор дьону, учууталлары, кыраайы үөрэтээччилэри, айар идэлээхтэри түмэр.
Соторутааҕыта түмсүү биир бөлөҕө Таатта улууһугар, улуу дьоммут олорон ааспыт ытык сирдэринэн, саха суруйааччылара төрөөбүт-үөскээбит алаастарынан сылдьан барда.
Чурапчы Болтоҥотуттан, саха суругун-бичигин төрүттээбит Сэмэн Новгородов төрөөбүт алааһыттан саҕалаан, ытык Таатта улууһугар Өксөкүлээх Өлөксөй Учайынан түмүктээтилэр. Улуу дьоммутугар анаммыт түмэллэри көрдүлэр, элбэҕи биллилэр, сибиэһэй салгыҥҥа аһаҕас халлаан анныгар балаакканан хоннулар.
Барытын харахтарынан илэ көрөн, улуу дьоммут хаампыт сирдэринэн сылдьан, тыыммыт салгыннарынан тыынан, астынан, өссө элбэх бырайыагы толкуйдаан бардылар.
Хаартыскалары ааптар ыытта.
-
7
-
0
-
0
-
0
-
0
-
0
