Таатта улууһугар быйыл күүскэ ардаан, от үрэхтэр ууларын таһыма үрдээбитэ отчуттарга кэккэ күчүмэҕэйдэри үөскэппит, ол эрээри, хаһаайыстыбалар кыстыыр отторун хааччынар соругу туруоран үлэлии-хамсыы сылдьаллар. Быйылгыттан «Байым» потребительскай кэпэрэтиипкэ «Уолба», «Эрэл» уонна «Байаҕантай» кэпэрэтииптэр холбоһоннор, ыһыы үлэтин күүскэ ыыппытар. 100 гектарга туораахтаах култуураны уонна уонча сыл туттуллубатах 210 гектардаах бааһынаны сөргүтэн, сүөһү аһылыгар анаан эбиэһи, виканы, Судан отун отун ыспыттар. Бааһына тула 7,5 км усталаах күрүөнү туппуттар. Үүнүү туруга үчүгэй эбит. Бу үлэ Тыа хаһаайыстыбатын уонна ас-үөл бэлиитикэтин министиэристибэтин «Кормопроизводство» бырагырааматынан уонна улуус хос үбүлээһинэн ыытыллыбыт. Көмө үбү сөптөөхтүк аттаран уонна хаһаайыстыба бэйэтин үбүн туһанан, салайааччы Егор Чахов улахан кыамталаах РОССЕЛЬМАШ тыраахтары, VELES фирма ыарахан ыйааһыннаах диискэтин, холбонор сиилэс комбайнын уонна сенажтыыр тиэхиньикэни ылыммыт. Мантан күһүн тиэхиньикэ күүһүн толору туһанан, сүөһү аһылыгын бэлэмнииргэ, сиилэһи уонна сенаһы суулуур саҥа сонун тэрили туттуохтара.
Миниистири солбуйааччы салгыы Чурапчы улууһугар Соловьев нэһилиэгэр, Мырыла сэлиэнньэтигэр Виктор Петров салайааччылаах бааһынай хаһаайыстыба сайылыгын, тутулла турар хотонун, бааһынатын, арыы оҥорор сыаҕын үлэтин көрдө-иһиттэ.
– Мырыла сирэ-уота Амма өрүс кытылыгар сытарынан, сүөһү аһылыгын бэлэмнээһиҥҥэ табыгастаах. Агрохимсулууспа 2023 сыллаахха гумус, микро-, макро- элеменнар төһө баалларын бэрэбиэркэлииргэ анаалыс ылбыта. Онон тэрээһиннээх хаһаайыстыбаларга уонна Мырылатааҕы кэпэрэтиипкэ анаан, сүөһү сиир араас култууратын ыһарга, улуус салалтатын кытта көдьүүстээх үлэ ыытыллыаҕа. Эһиил манна бааһынаҕа эбиэс эрэ буолбакка, подсолнух, кукуруза, Судан отун, ону сэргэ горох курдук буобтуҥу култууралары ыһан, холонон көрүөхпүт, – диэтэ сырыы түмүгүнэн Сахаяна Павлова. Бу туһунан министиэристибэ пресс-сулууспата иһитиннэрэр. Хаартыска: Тыа хаһаайыстыбатын уонна ас-үөл бэлиитикэтин министиэристибэтин пресс-киинэ.
-
0
-
0
-
0
-
0
-
0
-
0
