Атырдьах ыйын 21 күнүгэр Чурапчы улууһугар тахсан, оттооһун хаамыытын итиэннэ кыстыкка бэлэмнэнии туругун билсибитэ. Саҥа үөрэх дьылын көрсө «Оҕону оскуолаҕа тэрий» аахсыйаҕа кыттан, элбэх оҕолоох ийэлэри кытары көрсүбүтэ, оскуола боруогун атыллаары сылдьар кырачааннарга сэмэй бэлэхтэрин туттартаабыта, кинилэргэ ситиһиилэри баҕарбыта.
Бу күннэргэ Таатта улууһуттан икки нэһилиэк дьаһалтатын баһылыга кэлэн, Дмитрий Поисеевы кытары анаан-миинэн көрсөннөр, быһаарыыны эрэйэр кыһалҕаларын дьүүллэстилэр, элбэҕи сүбэлэттилэр-амалаттылар. Кыйы нэһилиэгин баһылыга Прокопий Турнин норуот дьокутаатыгар уопсай үлэ хаамыытын, кыстыкка бэлэмнэнии хайдах баран иһэрин билиһиннэрдэ. Дьиэ-уот хомунаалынай хаһаайыстыба министиэристибэтин уонна «Саха Өрөспүүбүлүкэтин ОДьХХ-та» судаарыстыба унитарнай тэрилтэтин кытары сыл устата ыытыллыбыт үлэ түмүгүнэн, чааһынай ыаллар дьиэлэрин киин хочуолунайга холбооһун иккис түһүмэҕэ саҕаланар буолбут. Дьэ онно ититэр ситими тардыы уо.д.а. курдук тэрээһин боппуруостары быһаарар ирдэммит.
Чөркөөх нэһилиэгин баһылыга Андрей Семенов нэһилиэгин үлэтин-хамнаһын туһунан кэпсээтэ. Быһаарыыны эрэйэр боппуруоһунан П.А. Ойуунускай аатынан Култуура дьиэтин тутуу буолбут. Бу тутууга хамсааһын тахсарыгар Тутуу министиэристибэтин кытары кэпсэтии, туруорсуу наада буолбут. Бу курдук, норуот дьокутаатыгар күннэтэ араас наадалаах, кыһалҕалаах, көрдөһүүлээх быыбардааччылар кэлэллэр. Кинилэр туруорар боппуруостарынан үлэ тиһигин быспакка ыытыллар.
Хаартыскалары Лена Кириллина ыытта
-
3
-
0
-
0
-
0
-
0
-
0
