Арассыыйа бастыҥ орто оскуолатын аатын сүгэр, Ураал-Сибиир федерациятын ассоцияцияламмыт оскуолаларыттан биирдэстэрэ, Таатта улууһун А.И.Софронов аатынан Ытык Күөл 1 №-дээх орто оскуолатыгар үгэс быһыытынан Билии күнүн тэрээһинэ олус сэргэхтик ааста. Чаҕылыччы тыгар күн бэйэтинэн арыаллаата. Саҥа 2025-2026 үөрэх дьылыгар 920 үөрэнээччини 75 учуутал үөрэх киэҥ байҕалын устун сирдиэҕэ, үөрэтиэҕэ. Мантан үөрэнээччи аатын саҥа ылар 86 оҕо түөрт маҥнайгы кылааска үөрэниэҕэ.
Үөрүүлээх чааска оскуола дириэктэрэ Иван Будикин, улуус дьокутааттарын мунньаҕын бэрэссэдээтэлэ Петр Максимов, “Саханефтегаз” үлэһитэ Петр Захаров, Таатта улууһун дьаһалтатын дьыалатын салайааччы Михаил Макаров, улуустааҕы үөрэх салаатыттан Татьяна Тютрина эҕэрдэлээтилэр. Петр Захаров Ил Түмэн дьокутаата Виктор Лебедев аатыттан маҥнайгы кылаас үөрэнээччилэригэр “Набор первоклассника” туттарда. Оскуола бастыҥ үөрэнээччилэрэ Владимир Андросов уонна Жанна Алексеева үөрэнээччилэргэ туһаайан эппит тыллара, “Самолетик будущего” аахсыйа буолан саҥа үөрэнээччилэргэ бэлэхтэннэ. Билии күнүн чуораана учууталлары, үөрэнээччилэри, күүтүүлээх уруокка ыҥырда.
Быйыл 1 «а» кылааһы үрдүк категориялаах учуутал, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин бастакы Президенын Михаил Николаев “Билиигинэн кыайыаҥ” мэтээлин хаһаайката, өрөспүүбүлүкэтээҕи “Таатта -- ийэ тыл биһигэ” хоһоон ааҕааччыларын бырайыагын, улуустааҕы алын кылаастар “Росточек” интеллектуальнай марафоннарын салайааччы Ирина Кондратьева ылла. Кини 1998 с. СГУ ПиМНО салаатын бүтэриэҕиттэн бу оскуолаҕа учууталлыыр.
Үөрэппит оҕолоро күн бүгүн өрөспүүбүлүкэ араас улуустарыгар айымньылаахтык үлэлии сылдьаллар, сорохтор үрдүк үөрэх кыһаларыгар, оскуолаҕа ситиһиилэхтик үөрэнэллэр. Билии күнүн бастакы уруогар оҕолор билии дойдутун устун айаннаан, үөрэтиэхтээх сирдэрин устун поездка олорсон айаннаатылар. Учуутал аргыһа портфель бэйэтинэн саҥаран, иһигэр кэһиилээх буолан, оҕолору соһутта, үөртэ. Сарсыҥҥыттан үөрэнэр баҕаларын биллэрэн, илиилэрин ууммут 12 кыыс, 11 уол, өйдөбүнньүк хаартыскаҕа түстүлэр, сибэкки дьөрбөтүн маҥнайгы учууталларыгар бэлэхтээтилэр.
Саҥа оскуола, саҥа кылаас, маҥнайгы учуутал, чуораан тыаһа доҕуһуоллаах, өйдөбүллээх күн, өйгө-санааҕа умнуллубаттык сөҥнүн, олох устун арыаллаатын.
-
15
-
0
-
0
-
0
-
0
-
0
