Үс күн устатыгар миниистир улуус баһылыгын кытары халаантан эмсэҕэлээбит нэһилиэктэргэ сылдьан, кыстыкка бэлэмнэнии туругун билистэ. Балаҕан ыйын 2 күнүгэр Уус-Ньара бөһүөлэгин уонна Төрүт нэһиигин бааһынай хаһаайыстыбаларын баһылыктарын кытары көрүстэ, ходуһалары көрдө-иһиттэ. Улуус киинигэр биирдэм урбаанньыт Илья Стенин хаһаайыстыбатыгар саҥа хотону тутуу боппуруоһун үөрэтэргэ эттэ.
Төрүт олохтоохторо ходуһа барыта ууга сытарынан, кыстыыр от хааччыллыбатаҕын эттилэр, киин улуустартан оту атыылаһыыны уонна уу суолун өрүсүһэн тиэйтэриини тэрийэргэ көрдөстүлэр.
– Бу суһал быһаарыыны эрэйэр боппуруоһу биһиги билэбит итиэннэ ураты хонтуруолга тутабыт, -- диэтэ Артем Александров.
Балаҕан ыйын 3 күнүгэр Өймөкөөн нэһилиэгэр буолбут көрсүһүүгэ олохтоохтор «Сүөһү аһылыгын бэлэмнээһин» бырагырааматынан 70 гектардаах бааһынаны чөлүгэр түһэрэр наадатын эттилэр. Томторго буолбут көрсүһүүгэ Сордоҥноох бэрэстэбиитэллэрэ, дьокутааттара кытыннылар. Манна эмиэ сири оҥоруу, ыччаты олохсутуу, үлэни-хамнаһы тэрийии тула киэҥ кэпсэтии таҕыста.
Балаҕан ыйын 4 күнүгэр миниистир Томторго Петр Протопопов салайааччылаах «Силис. Полюс Холода» кэпэрэтиипкэ, Үчүгэй нэһилиэгэр Семен Винокуров сылгы иитэр бааһынай хаһаайыстыбатыгар сырытта.
Оробуочай сырыы түмүгүнэн, киин улуустартан оту атыылаһыыны тэрийэн, уу суолун баттаһа тиэйэр, өрүстэри туоруур паромнарга харгыс суох буолуутун хааччыйар сорук туруорулунна. Онуоха тустаах эппиэттээхтэр ананан, сорудахтар бэрилиннилэр. Тыа хаһаайыстыбатын уонна ас-үөл бэлиитикэтин министиэристибэтэ халаантан эмсэҕэлээбит Өймөкөөн улууһун хаһаайыстыбаларын кыһалҕатын билэр, кинилэр кыстыгы бэлэмнээх көрсөллөрүн ураты хонтуруолга тутар. Бу туһунан министиэристибэ саайта суруйар.
Хаартыска: Тыа хаһаайыстыбатын уонна ас-үөл бэлиитикэтин министиэристибэтин пресс-киинэ.
-
0
-
0
-
0
-
0
-
0
-
0
