Балаҕан ыйын 9 күнүгэр Өймөкөөн улууһугар 180 туонна оту тиэйбит 14 массыыналаах бастакы холуонна аттаммыта. Олортон биэс массыына саамай ыраах сытар уһук нэһилиэккэ, Сордоҥнооххо, бэҕэһээ, балаҕан ыйын 14 күнүгэр тиийдэ. Ол туһунан нэһилиэк олохтооҕо, Өймөкөөн улууһун мунньаҕын дьокутаата Татьяна Готовцева кэпсээтэ:
– Бэҕэһээ биһиги нэһилиэккэ улахан үөрүү тосхойдо, букатын бырааһынньык тэҥэ буолла: Мэҥэ Хаҥалас улууһуттан 58,9 туонна оту ыгыччы тиэммит биэс улахан массыына кэллэ! Ону нэһилиэк баһылыгын солбуйааччы Анна Павлова тутта уонна сүөһүлээх ыалларга түҥэттэ. Тыа хаһаайыстыбатын улуустааҕы управлениетын салайааччы Инна Яковлева этэринэн, аны 60 туонна от кэлиэхтээх. Ходуһабытын барытын уу ылан, дьоннор ууну кэһэ сылдьан оттуу сатаатылар, сорохтор төрүт да кыайан оттооботулар, ыксааннар, сүөһүлэрин сүүстүүргэ сананнаммыттара. Билигин от кэлэн: «Сүөһүбүтүн эспэт буоллубут», – диэн үөрүүлэрэ-көтүүлэрэ сүр.
Оппут хаачыстыбата үчүгэй, сыаната да удамыр, биир туонната 7 000 солкуобай, биһиэхэ манна бэрт эрэйинэн оттонор буолан, сыана ыарахан. Төлөбүрүн окко наадыйар ыаллартан сайаапка оҥорор саҕана хомуйан биэрбиппит, оттон тиэйэр-таһар ороскуотун өрөспүүбүлүкэ уйунна. Инньэ гынан, нэһилиэкпит баһылыгар Альберт Вензелгэ, улууспут дьаһалтатыгар, Тыа хаһаайыстыбатын уонна ас-үөл бэлиитикэтин министиэристибэтигэр, Бырабыыталыстыбаҕа, Ил Дархан Айсен Николаевка итиэннэ от ыыппыт Мэҥэ Хаҥалас улууһун хаһаайыстыбаларыгар кыһалҕабытын өйөөн, көмөлөспүттэрин иһин барҕа махталбытын тиэрдэбит!
Хаартыскаларга Анна Павлова (Сордоҥноох) түһэриитэ.
-
1
-
0
-
0
-
0
-
0
-
0
