Алтынньы 13 күнүгэр түмүктэммит куонкурус кыайыылаахтарынан 15 пиэрмэр буолла, ол иһигэр, Анал байыаннай дьайыы кыттыылаахтара уонна кинилэр дьиэ кэргэттэрэ бааллар. От ыйыгар ыытыллыбыт дьиэ кэргэн пиэрмэлэрин куонкуруһун түмүгүнэн, 7 бааһынай хаһаайыстыба холбоон, 90,03 мөл солк суумалаах граны ылбыттара. Материальнай-тиэхиньиичэскэй баазаны хаҥатыыга куонкурус түмүгүнэн, «Ворошилов» (Кэбээйи), «Эргис» (Чурапчы) уонна «Сыа Бүлүү» (Бүлүү) кэпэрэтииптэри кытары, 29,77 мөл. солк. суумалаах субсидияҕа дуогабар түһэрсиллибитэ.
Бу ый бүтүүтүгэр тыа хаһаайыстыбатын потребительскэй кэпэрэтииптэрин кытары оҥоһуллар бородууксуйаны батарыы кээмэйин улаатыннарыыга субсидия куонкуруһу буолуоҕа. Бу сыалга 43,08 мөл солк. көрүллүөҕэ, өйөбүлү 10 кэпэрэтиип ылыаҕа. АПК-гы ресурсанан хааччыйыы өрөспүүбүлүкэтээҕи киинэ тоҕус ый устата кэпэрэтииптэргэ уонна бааһынай хаһаайыстыбаларыгар 1061 иһитиннэрэр-сүбэлиир өҥөнү оҥорон, былаанын 152 % толордо.
Урбааны өйүүр пуонда сыл саҕаланыаҕыттан тыа хаһаайыстыбатыгар идэтийэр дьоҕус биисинэс субъектарыгар 10 дуогабарынан 27,4 мөл солк суумалаах сойуому биэрдэ. Бу үпкэ тирэҕирэн, туох үлэни тэрийбитин туһунан Хаҥалас улууһун Чапаева сэлиэнньэтин бааһынай хаһаайыстыбатын баһылыга Степан Ильин маннык кэпсиир:
– Мин 2021 с. «Агростартап» гранын ыламмын, төрдүс сылбын сыбан сүөһүнү уотууга үлэлиибин. Ньирэй атыылаһан ылан, балтараа-ики сыл устата көрөбүн уонна уотан баран, эккэ туттабын. Былырыын 50 субаннаах этим, быйыл – 60. Субаным ахсаанын элбэтиэхпин, улахан хотон туттуохпун баҕарабын. Урбааны өйүүр пуондаттан ылбыт сойуоммунан комбикуорум, ньирэй үүтүн уонна от атыыласпытым. Быйыл улуустааҕы куонкуруска кыттан, сайдыы территориятын резиденин ыстаатыһын ыллым. Бу күннэргэ астыыр сыах тутуутун саҕалыахпыт, матырыйаала баар.
Бэрэсидьиэн Владимир Путин 2030 с. тыа хаһаайыстыбатын бородууксуйатын оҥоруу таһымын 25 %-ынан үрдэтэр соругун толорууга үлэ бу курдук ыытылларын туһунан Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэр.
Хаартыска: эрэдээксийэ архыыба.
-
0
-
0
-
0
-
0
-
0
-
0
