Алтынньы 26 күнүгэр Ыччат оһуокайа бэрт үрдүк таһымнаахтык ааста. Биһиги түмсүүбүт күрэхтэһиилэригэр мэлдьи көхтөөхтүк кыттар АГИКИ төрдүс кууруһун устудьуона Марфа Степанова доҕотторунаан кэлэн куорат олохтоохторугар Ыччат оһуокайын түһүлгэтин төрүттээтилэр. Быыһыгар Марфаны кытары кэлбит устудьуон доҕотторо, АГИКИ иһинэн тэриллибит «Долун» этнофольклорнай ансаамбыл толоруутугар сахалыы ырыалары истэн дуоһуйдубут.
Тэрээһиммит күнүс 2 чаастан ыччаттар алгыстарынан саҕаланна. Ол кэнниттэн Марфа Степанова оһуокай тылын таһааран, түһүлгэни төрүттээтэ. Оһуокай быыһыгар Алтайтан кэлэн үөрэнэ сылдьар Александр Карчагин уонна Илья Дугашев бэйэлэрин национальнай инструменнарынан доҕуһуоллатан, хабарҕа ырыатын толордулар.
М.К. Аммосов аатынан ХИФУ бастакы кууруһун устудьуона Эрик Егоров түһүлгэтигэр үҥкүүлэстибит. Кыргыттар сахалыы ырыаларынан поппури толорууларын сэргээтибит. Бу күн хомусчуттар толорууларын алыптаах оонньуутун бары сэргээтибит. Учууталлара Марфа Аммосова, Сандаара Ефремова, Эдуард Чоросов оһуокайдарыгар бары үҥкүүлэстибит. Наталья Заровняева алыптаах хомуһунан оонньообутун сэргээтибит.
Эдэр дьону өйөөн, Үөһээ Бүлүүттэн төрүттээх этээччилэр Болдьумаар Львов, Сергей Алексеев түһүлгэлэригэр үҥкүүлэстибит. Дьэ ити курдук ыччаттарбытыгар, АГИКИ көхтөөх, талааннаах устудьуоннарыгар, чуолаан Марфа Степанова доҕотторунаан бары түмсэн кэлэн түһүлгэлээбиттэригэр «Оһуокай» түмсүү аатыттан махтанабыт.
Ыччаттарга махтанан Дархан этээччи Валентин Хорунов харда түһүлгэни таһаарда. Ыччаттарбытыттан тэптэн, алгыстаах оһуокайбыт тохтообокко салҕанна.
Хаартыскаллары ааптар ыытта.
-
30
-
0
-
0
-
0
-
0
-
0
