Ааһан эрэр сыл төрдүс кыбаарталыгар Дмитрий Поисеевы кытары тус көрсүһүүгэ араас боппуруостарынан элбэх киһи сырытта, сорохтор туруорсууларын суругунан биэрэллэр. Норуот дьокутаата хас биирдии этиигэ, киирбит сурукка болҕомтолоохтук сыһыаннаһар, туруоруллар боппуруостары хайдах быһаарыахха сөбүгэр бэйэтин көрүүтүн этэр, сүбэлиир-амалыыр итиэннэ туһааннаах биэдэмэстибэлэргэ ыйытыктары ыытар, быһата, боппуруоһу тус хонтуруолугар ылар.
Ыытыллар тэрээһиннэргэ, араас таһымнаах күрэхтэһиилэргэ, оскуолалар, уһуйааннар үбүлүөйдэригэр, эмтэнэ барар дьоҥҥо биитэр олох күчүмэҕэйдэригэр түбэспиттэргэ көмөнү тэрийсэр. Наада тирээтэҕинэ, тустаахтары кытары сирэй кэпсэтэн кыһалҕаны быһаарар эбэтэр спонсордары буларга тирэх буолар.
Өрөспүүбүлүкэҕэ ыытыллар аахсыйалартан туора турбат. «Эр санаа хоппотугар» («Коробка храбрости») кыттыста, III Өрөспүүбүлүкэтээҕи физкультурнай-спортивнай күрэхтэһиигэ Анал байыаннай дьайыы 12 кыттыылааҕын кытары көрсөн олох-дьаһах туһунан сэһэргэстэ, элбэҕи сүбэлээтэ-амалаата, Саҥа дьылынан эҕэрдэлээн сэртипикээттэри биэрдэ.
Сыллата ыытыллар устудьуоннар түмсүүлэрин күрэхтэһиитигэр Чурапчыттан төрүттээх устудьуоннар «Хатыҥ чаран» түмсүүлэрин хамаандатын көрсөн, биэс эдэр киһиэхэ спортивнай пуормалары туттарда Сыл саҕаланыаҕыттан утумнаахтык үлэлэһэн, Чурапчы улууһун Чакыр нэһилиэгэр уонна Таатта улууһун Чөркөөх нэһилиэгэр САРМ муосталар кэлиилэрэ ситиһиллэр кыахха киирдэ.
Итини таһынан, Чурапчы уонна Таатта улуустарыгар былааннанар эбийиэктэр тутууларын үбүлээһинэ судаарыстыба бүддьүөтүгэр сөптөөхтүк көрүллэригэр, улуустар, нэһилиэктэр баһылыктара туруорсар араас боппуруостарыгар министиэристибэлэри, биэдэмистибэлэри кытары элбэх өрүттээх үлэ былаан быһыытынан ыытыллар. Ол курдук, Чурапчы улууһугар «Кыталык» уһуйаан, Көһөрүллүү түмэлин, Таатта улууһун Туора Күөл нэһилиэгэр култуура дьиэтин тутуутун, Чөркөөххө чааһынай ыаллар дьиэлэрин киин хочуолга холбооһун курдук о.д.а. боппуруостар тула үлэ, кэпсэтии күннэтэ кэриэтэ барар. Ити курдук норуот дьокутаата Дмитрий Поисеев быыбардааччыларын накаастарын толорууга утумнаахтык үлэлиир-хамсыыр.
Лена Кириллина.
Хаартыскалары ааптар тиксэрдэ.
-
4
-
0
-
0
-
0
-
0
-
0
