Хаҥалас улууһун Сиинэ нэһилиэгин олохтохторо Төрөөбүт тыл уонна сурук-бичик күнүн Култуура сынньалаҥ киинигэр тэрээһиннээхтик бэлиэтээтибит.
Сиинэ орто оскуолатыгар саха тылын уонна литературатын учууталынан өр сылларга үлэлээбит уопуттаах учуутал Саргылаана Васильевна Асекритова А.Е Кулаковскай – Өксөкүлээх Өлөксөй олоҕун, айар үлэтин итиэннэ удьуордарын туһунан слайдаларынан көрдөр-көрдөрө, кэпсээбитин бары олус кэрэхсээн иһиттибит. Саха литературатын төрүттээбит улуу суруйааччыбыт айар үлэтигэр сүгүрүйдүбүт.
Салгыы сахалыы остуол оонньууларыгар: хаамыскаҕа уонна хабылыкка күрэхтэстибит. Бэрт эриһиилээх, туһугар ыһыылаах-хаһыылаах, ол быыһыгар кыһыылаах күрэхтэһии түмүгүнэн, хаамыскаҕа Л.В. Леверьева барыбытын кыайда.
Хабылыкка 16 очукуолаах Т.Д. Золотарева бастаата. Кыайыылаахтарга эҕэрдэ, махтал тыллар этилиннилэр, бириистэр туттарылыннылар.
Тэрээһин оһуохайынан түмүктэннэ, бука бары илии-илииттэн ылсыһан, төгүрүччү туран оһуохайдаан эргийдибит. Оһуохай тылын Л.М. Слепцова уонна С.В. Асекритова таһаардылар.
Хас биирдии саха оҕото төрөөбүт тылынан киэн туттуохтаах, саха тыла атын омук тылыттан итэҕэһэ суох диэн өйдөбүллээх буолуохтаах.
Ульяна Степанова, Сиинэ.
-
1
-
0
-
0
-
0
-
0
-
0
