Дойду 67 эрэгийиэниттэн кыттыбыт 600 дэлэгээт кэккэтигэр Саха Өрөспүүбүлүкэтиттэн аһылык технологиятын киинин дириэктэрэ Айаал Тимофеев салайааччылаах 20 киһилээх дэлэгээссийэ кытынна. Дэлэгээссийэ састаабыгар бааһынай хаһаайыстыбалар уонна тыа хаһаайыстыбатын кэпэрэтииптэрин салайааччылара, үлэһиттэрэ, ол иһигэр «Кириэстээх» кэпэрэтиип ыанньыксыта Үлэ Доруойа Владимир Михайлов, бааллар.
Сийиэскэ кэпэрээссийэни сайыннарыыга, тыа хаһаайыстыбатын бородууксуйатын батарыыга, дьоҕус киэптээх хаһаайыстыбалары өйөөһүҥҥэ, нуормаламмыт-быраап аакталарын тупсарыыга киэҥ кэпсэтии таҕыста. Бастакы күҥҥэ төгүрүк остуоллар, иккис күҥҥэ пленарнай мунньах ыытылыннылар.
Долгутуулаах түгэнинэн бастыҥнары наҕараадалааһын буолла. Саха Сирин дэлэгээссийэтиттэн «Үтүөлээх пиэрмэр» аатынан Никон Куличкин (Үөһээ Бүлүү), Куприян Протопопов (Нам), «Бочуоттаах пиэрмэр» аатынан Айаал Тимофеев бэлиэтэннилэр. Т.С. Мальцев аатынан «Тыа хаһаайыстыбатыгар кылаатын иһин» мэтээлинэн Александр Фомин (Амма) наҕараадаланна. АККОР Бочуотунай Грамотатын Степан Яковлев (Сунтаар, Елена Семенова (Ньурба), Мария Аянитова (Чурапчы), Татьяна Воронкина (Үөһээ Бүлүү), Вера Яндреева (Хаҥалас), Госдуума Бочуотунай Грамотатын Тамара Осипова (Хаҥалас), Федерация Сэбиэтин Бочуотунай Грамотатын Үлэ Дьоруойа Владимир Михайлов (Сунтаар) туттулар. Бу туһунан тыа хаһаайыстыбатын уонна ас-үөл бэлиитикэтин министиэристибэтин пресс-киинэ суруйар.
Хаартыска: тустаах саайтан.
-
2
-
0
-
0
-
0
-
0
-
0
