Ил Дархан Айсен Николаев кулун тутар 25 күнүгэр таһаарбыт 894 №-дээх ыйааҕынан, Социалистическай Үлэ Дьоруойа В.М. Кладкин аатынан Судаарыстыбаннай бириэмийэ М.С.Лебедев аатынан аҕа ууһун общинатын баһылыгар Степан Лебедевка туттарылынна.
Степан Михайлович — удьуор табаһыт. Ахсыс кылааһы бүтэриэҕиттэн, олоҕун табаны иитиигэ анаата, 39 сыл устата үтөү суобастаахтык үлэлээтэ. Эдэркээн табаһыт уолу «Томпо» солпхуос дириэктэрэ Социалистическай Үлэ Дьоруойа Василий Михайлович Кладкин бэлиэтии көрөн, 2 №-дээх хомсомуол ыччат ыстаадатыгар биригэдьииринэн анаабыта. Степан Михайлович салалтатынан, биригээдэ тугут дьыалабыай тахсыытын 89,5 %, табаны чөл тутуууну 98,7 % ситиспитэ.
Бастыҥ биригэдьиир 1993 с. өрөспүүбүлүкэ дэлэгээссийэтин састаабыгар киирэн, уопуту атастаһыы, саҥа технологияны билсии чэрчитинэн Норвегияҕа, 2002 с. Финляндияҕа бара сылдьыбыта. Өрөспүүбүлүкэтээҕи күрэхтэһиилэргэ, сүлүөттэргэ элбэх төгүл кытынна. 2013 сылтан аҕа ууһун общинатын тэринэн, төрүт үгэһи сайыннарыыга үлэлии-хамсыы сылдьар. Элбэх ыччаты табаһыт идэтигэр уһуйда. Анал байыаннай дьайыы саҕаламмытыгар, уола Николай Аҕа дойду чиэһин көмүскүү барарын өйөөбүтэ. Байыас Николай Лебедев 2023 с. ахсынньыга бойобуой сорудаҕы толоро сылдьан, дьоруойдуу өлбүтэ.
Степан Михайлович Лебедев төһө да сааһырдар, ыстаадаҕа сылдьар, эдэр ыччаттарга настаабынньыктыыр, кинилэри өбүгэ төрүт дьарыгар уһуйар.
Кини үлэтэ – өрөспүүбүлүкэҕэ табаны иитиигэ, төрүт олохтоох хотугу омуктар үгэс буолбут хаһаайыстыбаннай дьарыктарын сайыннарыыга дьоһун кылаат буорлар. Бу туһунан Тыа хаһаайыстыбатын уонна ас-үөл бэлитикэтин министиэристибэтин пресс-киинэ иһитинэрэр.
Хаартыска: Тустаах саайтан.
-
0
-
0
-
0
-
0
-
0
-
0
