Сарсыарда 11 чаастан киэһэ 19 чааска диэри олохтоох ас-үөл, сувенир уонна саха таҥаһын дьаарбаҥкалара тэрилиннэ. Сайылыкка сыһыаннаах сиэр-туом толорулунна, алгыс этилиннэ, маассабай оонньуулар, куонкурустар, маастар-кылаастар ыытылыннылар.
Киин куорат дьаһалтатын баһылыга Евгений Григорьев бары мустубут дьону Сайылык күнүнэн, самаан сайын саҕаламмытынан эҕэрдэлээн туран, үлэ бастыҥнарыгар: Хатас нэһилиэгиттэн «Баҕарах» ХЭУо ыанньыксыта Елена Ксенофонтоваҕа, буҕаалтар Виктория Стручковаҕа, кэтэх хаһайыстыба баһылыга Клара Петроваҕа, Тулагы Киллэмтэн бааһынай хаһаайыстыба баһылыга Алексей Андреевка Махтал суруктары туттартаата. Чэгиэн доруобуйаны, ситиһиилээх үлэни баҕарда.
Тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова Сайылык күнүн суолтатын быһааран, өрөспүүбүлүкэ үрдүнэн төһө сайылык баарын туһунан кэпсээтэ.
Салааны сайыннарыыга өр сыллаах үрдүк көрдөрүүлээх үлэлэрин сыаналаан, «Туймаада» агрохолдинг сүрүн агронома Владимир Мироновка «Саха Өрөспүүбүлүкэтин тыатын хаһаайыстыбатын туйгуна» бэлиэни, министиэристибэ Бочуотунай грамотатын бааһынай хаһаайыстыба баһылыга Николай Захаровка, Махтал суругу «Баҕарах ХЭУо юриһа Светлана Барбахтыроваҕа, сүрүн зоотехник Ольга Слепцоваҕа уонна сүрүн бэтэринээр быраас Олег Прокопьевка туттарда.
Күнү быһа кафелар сылаас аһынан: кус миининэн, саламаатынан, үөлүллүбүт этинэн, алаадьынан-лэппиэскэнэн, быырпаҕынан айах туттулар. Сайылык күнүн эстрада сулустарын кэнсиэрдэ түмүктээтэ.
Хаартыска: ааптар түһэриитэ итиэннэ Тыа хаһаайыстыбатын уонна ас-үөл бэлиитикэтин министиэристибэтин пресс-киинэ.
-
0
-
0
-
0
-
0
-
0
-
0
