Уус Алдан нэһилиэктэрин олохторо-дьаһахтара, үлэлэрэ-хамнастара бу уу ситимиттэн улахан тутулуктаах. Ол курдук, Мүрү, Тумул, Сыырдаах, Майаҕас уонна Чараҥ нэһилиэнньэлэрэ, тэрилтэлэрэ, хаһаайыстыбалара сыл устата иһэр-туттар уулара хааччыллар, ходуһа уонна мэччирэҥ сирдэрэ нүөлсүтүллэллэр.
Тыа хаһаайыстыбатын уонна ас-үөл бэлиитикэтин министиэристибэтин Сиртэн үүнээйини ылыыга, мелиорацияҕа уонна уунан хааччыйыыга управлениетын Мүрүтээҕи салаата тэриллибитэ быйыл 30 сылын бэлиэтиир. Уопуттаах салайааччы Семен Сивцев салалтатынан, улуус мелиоратордара уу ситимин үтүө суобастаахтык көрөллөр-истэллэр. Туох тэрил алдьаммытын тута көрөн өрөмүөннээн иһэллэр.
Ууну хачайдыыр үлэ Өлүөнэ өрүс таһымыттан улахан тутулуктаах. Өрүскэ уу түстэҕинэ, ууну бырахтарыы уустугурар, ол ууну мунньар сирдэри толоруу тэтимин атахтыыр. Кэлиҥҥи икки сылга үп-харчы кырыымчыгыттан сылтаан, ууну бырахтарыы былаана иккитэ сарбылынна. Ити уу хаачыстыбатыгар, уонна саамай сүрүнэ нэһилиэнньэлээх пууннары хааччыйыыга охсуон сөп.
– Ууну хачайдаан бырахтарар носуостар ыстаансыйалара сыллата эргэрэн иһэр. Биһиги муус устартан саҕалаан ыстаансыйаны үлэлэтэргэ бэлэмннибит, туох ирдэнэринэн өрөмүөннүүбүт-сөргүтэбит. Сайын электроуот хаппырыыстыыра, бара-бара кэлэрэ уу ситимин үлэтигэр харгыстары үөскэтэр. Итинник ыарахаттартан иҥнибэккэ, кэлэктиип үтүө суобастаах, эпиэтинэстээх үлэтин түмүгэр туруоруллубут соруктары сыллата толоробут, саамай кураан сирдээх-уоттаах нэһилиэктэри уунан хааччыйабыт, – диир салаа ууну туһаныыга уонна кадаастырга отделын начаалынньыга Айуран Березкин.
Мелиоратордар үлэлэрэ мэлдьи бэлиэтэнэр буолбатах, ол эрээри кинилэр үлэлэрин суолтата туохха да тэҥнэммэт. Уу баар – олох баар, кураайы алаастар чэлгийэллэр, ол аата -- нэһилиэктэр үүнэллэр-сайдаллар, тыа хаһаайыстыбатын көрдөрүүтэ улаатар, саха норуота чэчириир.
-
1
-
0
-
0
-
0
-
0
-
0
