Онон кинилэр маастарыстыбаларын үрдэтэр, бастыҥнар уопуттарын тарҕатар итиэннэ аныгы биотехнология ньымаларын туһаныы сатабылларын үөрэтэр сылтан, сыллата өрөспүүбүлүкэтээҕи куонкурус ыытыллар. Быйыл, осеменатордар уон иккис өрөспүүбүлүкэтээҕи куонкурустара от ыйын 1 күнүгэр АГАТУ баазатыгар тэриллибитэ. Тоҕус улуустан 10 исписэлиис кэлэн, күөн көрсүбүтүттэн, хас да түһүмэхтээх күрэхтэһии түмүгүнэн, Хаҥалас улууһун Улахан Ааныттан «“Бөртө“ сылгы собуота» хааччахтаммыт эппиэтинэстээх тэрилтэ осеменатора Надежда Васильева бастаабыта, «Бөтүҥ» тыа хаһаайыстыбатын кэпэрэтиибин осеменатора Мария Никитина (Амма) иккис миэстэни ылбыта, Элгээйи нэһилиэгин осеменатора Раиса Иванова (Сунтаар) үһүс миэстэ буолбута. Кинилэри чиэстээһин от ыйын 2 күнүгэр Бырабыыталыстыба 1 №-дээх дьиэтигэр, Арассыыйа Федерациятын Уһук хотугу эрэгийиэнигэр уонна Аартыкаҕа судаарыстыбаннай племенной сулууспа тэриллибитэ 75 сылыгар анаммыт норуоттар икки ардыларынааҕы пуорум үөрүүлээх мунньаҕар буолбута.
Надежда Серафимовна «“Бөртө“ сылгы собуота» хаһаайыстыбаҕа осеменаторынан үлэлээбитэ балайда буолла. Кини үтүө суобастаах сыратынан Уу Көхсүн пиэрмэтин 130 ыанар ынаҕа 90 % буоһатыллан, төрүөххэ да, үүтү ыаһыҥҥа да сыллата үрдүк көрдөһүүнү ситиһэр. Даҕатан эттэххэ, кини быйылгы биир үрдүк ситиһиитинэн Сайылык күнүгэр «Саха Өрөспүүбүлүкэтин тыатын хаһаайыстыбатын туйгуна» үрдүк аатынан бэлиэтэммитэ буолар.
Надежда Серафимовна 5 оголоох, 4 сиэннээх улахан ыал ийэтэ. Улахан кыыһа Кэрэчээнэ Николаевна «Бөртөҕө» зоотехнигынан үлэлээбитэ хаһыс да сыла буолла, зоотехниктар өрөспүүбүлүктээҕи куонкурустарыгар бастакы миэстэни ылан, Бүтүн Арассыыйатааҕы күрэхтэһиигэ ситиһиилээхтик кыттыбыта. Киини кэргэнэ Дьулустаан агроном идэлээх, ол идэтинэн эмиэ ситиһиилээхтик үлэлии сылдьар.
Иккис кыыһа Мичийээнэ кэргэнинээн Юрийдыын ньирэй көрөллөр. Оттон улахан уола үрдүк үөрэҕи бүтэрэн балык собуотугар исписэлиһинэн үлэлии сылдьар. Оскуолаҕа үөрэнэр икки кыра кыыс эмиэ туох да үлэттэн иҥнэн-толон турбаттар, Сахайаана бэтэринээр үөрэҕэр киириэн саныыр, кулун тутарга агрошколалар куонкурустарыгар бастаабыта. Ити курдук, үлэни өрө туппут ийэ оҕолоро эмиэ бары үтүөкэн үлэһит дьоннор. Нэһилиэк инники кэскилин уһаналлар.
Надежда Серафимовна кэргэнэ Николайдыын оҕуруот, сибэкки олордоллор, сүөһү ииттэллэр. Кинилэр курдук, төрүт үгэһи өрө тутар, оҕолорун үлэҕэ сыһыаран иитэр саха ыаллара элбии туруохтуннар.
Хаартыскалары ааптар ыытта.
-
7
-
0
-
0
-
0
-
0
-
0
