Быыстапка-дьаарбаҥка бырагыраамата олус киэҥ. Ол курдук, балаҕан ыйын 24 күнүгэр АГАТУ-га тыа хаһаайыстыбатын исписэлиистэригэр, кэпэрэтииптэр чилиэннэригэр, АБДЬ кыттыылаахтарыгар анаан сэминээрдэр ыытыллыахтара. Тыа хаһаайыстыбатын уонна ас-үөл бэлиитикэтин министиэристибэтигэр тыа хаһаайыстыбатын улуустардааҕы управлениетын салайааччылар бэриллибит боломуочуйалары олоххо хайдах киллэрэ, туох үлэни-хамнаһы тэрийэ сылдьалларын туһунан ырытыһыахтара.
Балаҕан ыйын 25 күнүгэр Уопсастыбаннай кииҥҥэ тыа хаһаайыстыбатын табаарын оҥорооччуларга анаан «Тыа сирин күүһэ» диэн пуорум буолуоҕа. Ити күн күнүс 13:00 чаастан быыстапка-дьаарбаҥка үөрүүлээх аһыллыыта буолуоҕа. Бырагырааманан салааларынан араас куонкурустар, көрүүлэр тэриллиэхтэрэ. Кыайыылаахтары субуотаҕа уонна өрөбүлгэ наҕараадалыахтара.
Балаҕан ыйын 26 күнүгэр, күнүс 14:00 чаастан С.М. Аржаков аатынан АГАТУ ипподромугар Тыа хаһаайыстыбатын уонна ас-үөл бэлиитикэтин министиэристибэтин бирииһигэр ат сүүрдүүтэ ыытыллыаҕа. Тэрийэр хамыыһыйа куорат олохтоохторун уонна ыалдьыттарын быыстапка-дьаарбаҥкаҕа сылдьаҥҥыт, кыстыыр аскытын-үөлгүтүн хааччыныҥ диэн ыҥырар.
-
1
-
0
-
0
-
0
-
0
-
1
