Бу күннэргэ студияҕа Өрөспүүбүлүкэтээҕи реабилитациялыыр киин оҕолоро анаан-минээн кэлэн ыалдьыттаан бардылар. Бу тэрээһин аан дойдутааҕы килиэп күнүгэр ананна, олус интэриэһинэй уруокка сырыттылар.
Көрсүһүү бырагыраамата баай ис хоһоонноох буолла уонна билиини биэрдэ. Оҕолору сөптөөх аһылык төрүттэригэр билиһиннэрдилэр, эрдэттэн бэлэмнэниллибит видеоролигынан килиэп сиэмэтиттэн долбуурга диэри суолун ырылыччы көрдөрдүлэр. Оҕолор килиэпкэ аналлаах таабырыннары таайдылар, билиини тургутар викториналарга уонна интэриниэт оонньууларга көхтөөхтүк кытыннылар. Бырааһынньык чыпчаалынан килиэп-буулка оҥоһуктарын амсайыы буолла, биллэр турар, ону бары олус сөбүлээтилэр, астыннылар.
Ордук айымньылаах түһүмэҕинэн маастар-кылаас буолла. Оҕолор ийэлэрин кытта собуот маастардара бэлэмнээбит бирээнньиктэрин киэргэттилэр. Бырааһынньык бүтүүтүгэр хас биирдии оҕо өйдөбүнньүк бэлэхтэри тутта. «Маннык көрсүһүүлэр аҥаардас килиэп хантан кэлэрин туһунан эрэ буолбакка, оҕолорбут барахсаттар амарах уонна сылаас сыһыаны билэллэригэр улахан суолталаах», — диэн төрөппүттэр санааларын үллэһиннилэр.
«Дьокуускайдааҕы килиэп кэмбинээтин» маркетиҥҥа отделын салайааччыта Елена Марк: «Маннык хабааннаах тэрээһиннэри биһиги нэдиэлэ аайы ыытабыт. Килиэп күнүгэр анаан ураты бырааһынньыгы Өрөспүүбүлүкэтээҕи реабилитациялыыр киин оҕолоругар тэрийдибит. Оҕолор олус үөрдүлэр. Бэрээнньиги киэргэтиини ордук астыннылар. Биһиги үтүө үгэһинэн коррекционнай оскуолалары кытта босхо үлэлиибит. Маастар-кылаастарбытыгар суруттарыы атырдьах ыйыттан эһиил ыам ыйыгар диэри туолла. Ол эрээри, коррекционнай оскуолалар, реабилитациялыыр кииннэр оҕолорун уопсай уочараттан таһынан ылабыт», — диэн кэпсээтэ.
Ааптар хаартыскаҕа түһэриилэрэ.
-
0
-
0
-
0
-
0
-
0
-
0
