Бу күн араас сылларга кыргыс толоонугар охтубут буойуттары кэриэстээн иһийэн, нөрүйэн туруох тустаахпыт, кинилэр олохторун суолун эргиллэн көрөн, хорсун санааларыгар сүгүрүйэн, кинилэр оҥорботохторун оҥорор, ситэрбэтэхтэрин ситэрэр санааны кэнэҕэски ыччакка иитиэхтээхпит.
Хоһооҥҥо этиллэрин курдук, дойдуларын буорун булбатах уолаттарбыт уонна сырдык тыыннара хабараан хапсыһыыга быстыбыт дуолан дьоммут ыраас дууһалара туруйа буолан, эбэтэр сырдык сулус буолан дойдуларын эргийэ көтөн одуулуур эбит буоллахтарына, кинилэр эмиэ хас биирдиибит курдук уйадыйан туран: "Миигин умнубатахтар эбит!" -- диэн өрө тыынан эрдэхтэрэ...
Намҥа
Кэриэстэбил күнүн үрдүк күүрүүлээхтик Нам улууһугар улуус баһылыга Юрий Слепцов өйөбүлүнэн үһүс төгүлүн тэрийдилэр. Ол курдук, бу күн 290-тан тахса оҕо хоһоон ааҕыытыгар, уруһуйга, эссе суруйан күрэхтэстилэр. Оҕолор уруһуйдара диэтэххэ, олус дириҥ ис хоһоонноох буолан, бэл бу уруһуйдар тиллэн, тыыллан-хабыллан кэлиэх курдуктар. Ол курдук, киһи бөтө бэрдэрэр көстүүлэрин оҕолор барахсаттар дьүһүйбүттэр. Тэрээһиҥҥэ кыттыбыт оҕолор кэрэҕэ уһуйуллан үтүө-мааны, аһыныгас, эйэҕэс дьон буолуохтара, киртэн-хахтан тэйэн сырдыкка, үтүөҕэ дьулуурдаах дьон буолуохтара диэн бигэ эрэллээхпин.
Бүлүүгэ
Кэриэстэбил күнэ, алтынньы 22 күнүгэр, Бүлүү оройуонун бибилэтиэкэтин көҕүлээһининэн, Бүлүү куоракка ыытылынна. Бу тэрээһин тула эдэр-эмэн дьон тоҕуоруһан олус уйан литэрэтииринэй-мусукаалынай туруоруу көрдөрүлүннэ. Онтон дыбарыас түһүлгэтигэр дойдуларыгар эргийбэтэх хаарыаннаахай уолаттарбыт субу ортобутугар баар курдук сэмэйдик иһийбит мэтириэттэриттэн көрөн турдулар. Кинилэр олорон ааспыт олохторун, кутаа уоттаах сүрэхтэрин арай мөссүөннэрин иннигэр умайбыт чүмэчи симик уота туоһулуур...
Бу кыргыс хонуутугар охтубут уолаттары кэриэстиир, саныыр анал күнү умнумуоххайыҥ, атын өрөгөй күннэригэр ардыгар өлбүттэри умнабыт эбээт! Сатаатар биир күн ис сүрэхтэн кинилэр чугас дьонноругар кутурҕан биллэрэн, иһийэн, нөрүйэн ыар сүтүктэрбитин билинэн, кинилэр ааттарын ааттаан олорботох олохторун уһатыаххайыҥ, үйэтитиэххэйиҥ.
Антонина Ускеева, Бүлүү-Нам.
Хаартыскалар: Савва Семенов түһэриитэ уонна Нам улууһун үөрэҕин управлениетын тиксэриитэ.
-
1
-
0
-
0
-
0
-
0
-
0
