Үс устар үөстээх улуу эбэбит, аһатар-харыстыыр Өлүөнэбит сүрүн үөһэ тымныыны кытта харсыһа сатаан кытыыта кырыыланан, кыдьымаҕынан кырдьыыланан, чысхаанныын охсуһа сатаан хаарынан модьоҕолонон, сиикэйэ силбэһэн сэтинньи бурҕаҥнас тыыннаах тымныытыгар баһыйтаран бөтүөхтэс бааллара ньимийэн, муус болгуо иһигэр иһийэн хаалла...
Эдьигээн эбэ балыксыттара ону эрэ кэтэспиттии улуу эбэ сүрүн сүүрүгэ мууһунан бүрүллээтин кытта, хаарынан тибиллибитин тутуһа өбүгэ ыллыгын батыһан аһатар-сиэтэр эбэлэригэр киирдилэр.
Быйыл да, былыр да эбэ барахсан субу кэми аһардыбат - Эдьигээн сэлиэнньэтин аннынан сэтинньи 5-6 күннэрин быыһыгар хараҥанан саптынан кыһыҥҥы суорҕанынан сабынна.
Балыксыттар бүгүн сүрүн үөһү таһынан, өссө да бөҕөргүү илик чараас мууһа кыйа таастыганнарын таһаллар, дьаакырдарын тиэйэллэр, илимнэрин бэрийэллэр, өрүстэрин чуҥнууллар, тыаһы-ууһу иһиллэнэллэр, ботур-ботур кэпсэтэллэр. Күндүөбэйгэ бэлэмнэнэллэр.
Күндү балык күндүөбэй, норуот балыга күндүөпкэ муораттан өксөйөр, тымныыны кытта биир суоллаах, чысхааны кытта аргыстаһар айылҕаттан аналлаах! Бар дьон эйиигин уруйдуур-айхаллыыр, хоһоонугар хоһуйар, ырыа гынан ыллыыр, пааматынньыктары туруорар!
Алексей МАТВЕЕВ
Хаартыскалар Алексей Шадрин, Юрий Шамаев
-
1
-
0
-
0
-
0
-
0
-
0
