Анна Петрова, төрөппүт:
- Дьокуускай куорат 31№-дээх оскуолатыгар үөрэхпит Учи.ру платформаҕа саҕаланна. Учуутал быһаарыыта суох арыый эрэйдээх буолсу. Дьиҥэр, Учи.ру судургу, оҕоҕо өйдөнүмтүө бырагыраамманан үлэлиир. Төрөппүт эппиэтинэһэ элбээн тахсар – оҕо үөрэнэригэр син биир хонтуруол наада. Оҕолорум бэйэлэрэ үөрэнэргэ бэлэмнэр, ол эрээри, мин саныахпар, учуутал тиийбэт.
Мария Ханды, төрөппүт:
- Интернет мөлтөх. Араас учуутал араас платформаҕа үлэ биэрэрэ эрэйдээх эбит. Оҕолор дьиэҕэ олорон сүрэҕэлдьииллэр, үөрэнэр турукка сүгүн-саҕын киирбэттэр. Кыра оҕону наар маныахха, өйдөтүөххэ наада. Бириэмэ бөҕө таах барар. 8 чаастан үөрэнэн саҕалаабыппыт, билигин да бүтэ иликпит. Аны интернеккэ оҥорор сорудахтара толорон истэх аайы тута оҥоһуллубут ахсааныгар укпат, хос-хос, саҥаттан киирэн оҥороллор. Оннук-маннык Zoom бырагырааммата суох, көннөрү сорудахтарынан үөрэнэллэрэ быдан таһаарыылаах буолуо этэ, аралдьыйбакка үлэлиэхтэрэ дии саныыбын.
Евдокия Слепцова, төрөппүт:
- Аммаҕа уоту ылан кэбистилэр. Үөрэх тохтоон хаалла. Уопсайынан, уоту араарар тэрилтэни кытта эрдэттэн ситимнээх үлэни ыытар бэрт буолуо этэ. О5олор сарсыарда сорудах эрэ ылан баран, ону киэһэ биирдэ эрэ толорор кыахтаахтар.
Санатар буоллахха, дистанционнай үөрэххэ бэлэмнэнии харантыын биллэриллиэҕиттэн саҕаламмыта. Учууталлар күн аайы араас платформаларга уруок ыытан боруобалаан көрбүттэрэ. Өрөспүүбүлүкэ сорох улуустара, хомойуох иһин, интернет ситимэ мөлтөх буолан, быһа сибээскэ кыайан үөрэммэккэ, ким бассаап нөҥүө, ким сорудаҕын флешканан бэрсэн, ким аҥардас учебнигынан үөрэнэн көрбүттэрэ.
Бу туһунан ааптар инники суруйбут матырыйаалын аах.
-
0
-
0
-
0
-
0
-
0
-
0
