Бу сыл иккис аҥарыгар QR-код систиэмэтэ олоххо киириэҕиттэн, хас биирдии эрэгийиэҥҥэ гражданнар араас кыһалҕалары көрсөллөр. Ковид утары вакцинациятын туһуолуу сертификата суох киһи бүгүн отельга, атыы-эргиэн киинигэр, киинэҕэ, уопсастыбаннай аһылык тэрилтэтигэр киирбэккэ эрэ төннөр, оттон сорох эрэгийиэннэргэ уопсастыбаннай тырааныспарга айанныыр кыаҕа суох.
Санаттахха, Татарстааҥҥа ордук кытаанах хааччахтары олохтообуттара. Онно куораттар икки ардыларынааҕы эрэ буолбакка, уопсастыбаннай тырааныспарга барытыгар сырыы кэмигэр QR-код көрдөрүллүөхтээх. Мантан сибээстээн, Казань олохтоохторо уопсастыбаннай тырааныспар бэрэстэбиитэллэригэр «бойкуот» биллэрдилэр. Билигин кинилэр түмсэннэр, социальнай ситимнэргэ араас хабааннаах бөлөхтөрү тэрийдилэр. Массыыналаах дьон билигин биир дойдулаахтарыгар босхо өҥө оҥороллор - босхо таһаллар. Суоппардар бэйэлэригэр сөптөөх маршруттары оҥостоллор уонна аара суолга дьон хомуйаллар. Аны туран, «подвези без QR» диэн ыҥырыылаах аахсыйанан өҥөлөрү оҥороллорун таһынан, интэриниэткэ биллэрии таһааран, атыы-эргиэн кииннэригэр киирэн наадалаах табаардары атыылаһан биэрэллэр. Маннык өҥөнөн холобур, Иркутскайга туһаныахха сөп. Өҥө сууматын сыаната киһи төһө ыраах барыахтааҕыттан уонна туруоруллубут соруктарыттан тутулуктанар. Оттон Пермь куоракка, видеосибээһинэн таҥас атыылаһан, дьиэлэригэр диэри илдьэн биэрэллэр.
Бэлиитикэ чинчийиитин институтун дириэктэрэ Григорий Добромелов этэринэн, мантан салгыы үрдүкү былаастар ковиды утары охсуһууга саҥаттан саҥа хааччахтары киллэрэр буоллахтарына, инникитин итинник дьон араас хабааннаах бөлөхтөрө өссө элбиэхтэрэ. Эксперт сыанабылынан: «Сыыйа-баайа кыра көҕүлээһиннэр уопсастыбаннай хамсааһыннарга диэри улааталларыгар тиэрдиэн сөп», - диэн «РК» суруйар.
- 0
- 0
- 0
- 0
- 0
- 0