Ааһан эрэр сыл аан дойдуга бүтүннүүтүгэр улахан уустуктары үөскэттэ. Биһиги хас биирдиибит күннээҕи олохпутугар үгүс хааччахтары көрүстүбүт – чугас дьоммутун, доҕотторбутун кытта көрсөн ирэ-хоро кэпсэтэрбитин, илии тутуһан эҕэрдэлэһэрбитин суохтуубут. Ол эрэн, бу биһигини күүстээх санаалаах, тулуурдаах, бэйэ-бэйэҕэ аһыныгас сыһыаннаах уонна өйөбүл буоларга үөрэттэ. Билигин киһи хараҕар көстүбэт өстөөҕү утары охсуһууга судаарыстыба туох баар күүһүн түмэрэ, эмчиттэр үрдүк таһымнаах үлэлэрэ, чугас дьоммутун харыстааһын туохтааҕар да улахан суолталаах.
Бу уустук кэмҥэ биһиги Аҕа дойду Улуу сэриитигэр Кыайыы 75 сылын бэлиэтээбиппит. Биир дойдулаахтарбыт кыргыһыы толоонугар олохторун толук ууран туран хорсуннук киирсибит туоһулара билигин даҕаны көстө тураллар. Бу үлэ салгыы ыытыллыа диэн эрэллээхпин. Бүтүн Арасыыйа үрдүнэн ыытыллыбыт Төрүт сокуоҥҥа уларытыы киллэрии иһин куоластааһын дьон-сэргэ бигэ туруктаах, кырдьыгы көрдөрөр олоҕу ирдиирин, бэйэ норуотун устуоруйатыгар бэриниилээх сыһыанын арылхайдык көрдөрдө.
Ааһан эрэр сылга Аартыканы сайыннарар уонна онно олорор дьон-сэргэ олоҕун тупсарар сүрүн соруктаах «2035 сылга диэри кэмҥэ РФ Аартыкатааҕы түөлбэтин сайдыытын уонна дойдуга куттал суох буолуутун хааччыйыы Стратегиятын туһунан» РФ Бэрэсидьиэнин Ыйааҕа Арассыыйа хоту дойдутун олохтоохторугар ордук суолталаах буолла. 2021 сылга Саха Өрөспүүбүлүкэтэ туруоруммут сыалын ситиһэргэ иннин диэки кимиилээхтик баран иһиэҕэ. Онуоха былаас бары салаалара, уопсастыба түмсүүлэрэ, биһиги дойдубут элбэх омуктаах олохтоохторо бииргэ ылсан үлэлээтэхпитинэ дойдубут үүнэ-чэчирии, сайда, олохпут таһыма үрдүү туруоҕа. Кэлэр өттүгэр өрөспүүбүлүкэ ылынар сокуоннарын РФ Төрүт сокуонун саҥа балаһыанньаларыгар сөп түбэһиннэриигэ саха парламеныттан ымпыктаах-чымпыктаах, дириҥ толкуйдаах, үгүс өрүттээх үлэ ирдэнэр.
Күндү Сахам сирин дьоно, кэлэн иһэр Саҥа дьыл эһиги алаһа дьиэҕитигэр үгүс үөрүүнү, байылыат олоҕу аҕаллын! Эһиэхэ уонна чугас дьоҥҥутугар саха алмааһын курдук кытаанах доруобуйаны, уостубат тапталы, уһун дьоллоох олоҕу, үрдүктэн үрдүк ситиһиилэри баҕарабын! Ыра санааҕыт ыпсан истин, толкуйдаабыккыт туола турдун! Саҥа дьылынан!
Саха Өрөспүүбүлүкэтин
Ил Түмэнин Бэрэссэдээтэлэ
Петр Гоголев
-
0
-
0
-
0
-
0
-
0
-
0
