-- Биир кэлим экзамеҥҥа (ЕГЭ) 100 баалы ылыы – уон биир сыллаах үөрэх түмүгүн үрдүкү көрдөрүүтэ. Үрдүк көрдөрүү дэбигис кэлбэт, улахан утумнаах үлэнэн ситиһиллэр. Бу биһиги оҕолорбут үтүө суобастаах кыһамньыларын уонна туйгун көрдөрүүлэрин сиэрдээхтик көҕүлүөҕэ диэн эрэнэбин, – диэтэ өрөспүүбүлүкэ баһылыга.
Былырыын өрөспүүбүлүкэ үрдүнэн 30 оҕо биир кэлим экзамеҥҥа 100-түү баалы ылбыттара: литератураҕа – 13, нуучча тылыгар – 8, информатикаҕа – 4, химияҕа —2, физикаҕа, историяҕа уонна биологияҕа биирдии оҕо. Саамай үрдүк көрдөрүү 2017 сыллаахха ситиһиллибитэ -- 100-түү баалы 49 оҕо ылбыта: нуучча тылыгар – 37, математикаҕа – 6, физикаҕа, информатикаҕа иккилии, историяҕа уонна литератураҕа биирдии.
Быйыл оскуоланы бүтэрээччилэргэ экзамен туттарыыта ыам ыйын 19 күнүттэн саҕаламмыта. Билиини тургутуу саҥа технологиянан ыытыллар: экзамен матырыйааллара Интернет ситиминэн бэриллэллэр, экзамен матырыйаалларын толору кэмпилиэгэ ППЭ аудиторияларыгар бэчээттэнэр уонна сканируйданар. История предметигэр судаарыстыбаннай экзаменнары ЕГЭ киэбинэн ыытарга саҥа технология үс көрүҥүн тэҥинэн, итиэннэ далааһыннаахтык киллэрии ааспыт өттүгэр суох этэ.
Экзамены туттарыыга 311 пуун тэрилиннэ. Уон биирис кылаастарга түмүк судаарыстыбаннай аттестацияҕа (ГИА-11) кыттарга 8 498 киһи регистрацияланна. Ол иһигэр, уопсай орто үөрэхтээһин оскуолатын быйыл бүтэрэр 7901 оҕо, анал орто үөрэҕи бүтэрэр 14 оҕо, уопсай орто үөрэхтээһин оскуолатын ааспыт сылларга бүтэрбит 497 киһи, ыйыталаһааччы 85 киһи итиэннэ үөрэх кыһатыгар киирэр биир омук киһитэ. Уон биирис кылаастарга түмүк судаарыстыбаннай аттестацияны оскуоланы бүтэрэр судаарыстыбаннай экзамен киэбинэн туттарарга 230 киһи сайаапкалаабыт.
ЕГЭ-ни о.д.а. сыаналааһыны тэрээһиннээхтик, чиэһинэйдик ыытыыга Саха Өрөспүүбүлүкэтэ Арассыыйа Федерациятын 85 субъегыттан 21-22 миэстэни ылан, «күөх зонаҕа» киирдэ.
-
1
-
0
-
0
-
0
-
0
-
0
