Эһиилгиттэн абитуриент докумуонун бэйэтэ аҕалан биэриэн эбэтэр “Госуслуги” порталга “Поступление в ВУЗ онлайн” сервис көмөтүнэн ыытыан, итиэннэ ХИФУ priem2021.s-vfu.ru диэн электроннай информационнай систиэмэтигэр тус кэбиниэт арынан, онно угуон сөп.
ХИФУ абитуриеннара кэлэр үөрэх дьылыттан үһүс эксээмэннэригэр ханнык предмет баалын биэрэллэрин бэйэлэрэ быһаарар буолуохтара. Маныаха хайысхалара биир соҕус предметтэртэн талларыахтара. Холобура, суруналыыстыкаҕа химия ЕГЭ-тин көрдөрбөт буоллаҕыҥ дии. Математикаҕа туттарсар оҕо ахсааҥҥа уонна нуучча тылыгар булгуччулаах эксээмэннэрин таһынан, үсүһүгэр эбэтэр физика, эбэтэр информатика, эбэтэр геометрия түмүгүн биэриэн сөп – хайаларын баала үрдүгүттэн көрөн.
Оскуола кэмигэр актыбыыс оҕолор тус ситиһиилэринэн эбии баал аахтараллара уруккуттан баар уопут. “Маныаха өйдүөххэ наада – хас ситиһии аайы баал эбиллибэт, муҥутаан 10 баал буолуон сөп. Урукку сылларга тэҥнээтэххэ, ситиһии ааҕыллыытын пууна көҕүрээтэ. ГТО бэлиэтэ, спортивнай уонна интеллектуальнай спорт көрүҥнэригэр кыттыы, оскуоланы, орто анал үөрэҕи кыһыл аттестатынан, дипломунан бүтэрии, волонтердааһын, олимпиадаларга миэстэлэһии, о.д.а. инники күөҥҥэ тураллар ”, — диир ректор. Манна даҕатан бэлиэтээтэххэ, быйылгыттан дуобат, саахымат үрдүк таһымнаах күрэхтэһиилэрин кыайыылаахтарыгар 8 баал, призердарыгар 5 баал эбиллэр буолла.
Эһиилгиттэн үөрэххэ туттарсааччылар испииһэктэригэр абитуриеннар ааттара суруллубат буолуоҕа. Ол оннугар СНИЛС нүөмэрэ ыйыллыаҕа эбэтэр туспа код иҥэриллиэҕэ. Информация күҥҥэ биэстэ саҥардыллыаҕа.
ХИФУ-га туттарсар абитуриент докумуонун сүрүн үрдүк үөрэх кыһатын 5 хайысхатыгар, итиэннэ хас биирдии филиалыгар 3-түү хайысхаҕа биэрэр кыахтаах. Онон ааспыт сылларга тэҥнээтэххэ, киирэр шанс улаатан биэрдэ.
-
0
-
0
-
0
-
0
-
0
-
0
