Отчуоттуур бөлөх Усуйаана сынньалаҥын киинигэр нэһилиэнньэни кытары көрүстэ. Мунньаҕы нэһилиэк баһылыга Софья Андреевна арыйан саҕалаата. Олохтоохторго СӨ Бырабыыталыстыбата 2022 с. ыытыллыбыт үлэтин сырдатар киинэни көрдөрбүттэрэ сэҥээриини ылла. СӨ Бырабыыталыстыбатын сыллааҕы үлэтин туһунан сүрүн дакылааты бөлөх салайааччыта Сергей Неустроев оҥордо.
Николай Слепцов, биэнсийэлээх: — Интэриниэт кэлиитэ, бастакытынан, олус үчүгэй. Ол эрэн, иккис өттүнэн, интэриниэт кэлиитэ оҕоҕо мөкү өрүттэрдээх. Иккиһинэн, тыа хаһаайыстыбатын салаатыгар субсидия ылбыттар отчуотугар тиэхиникэ ылыытыгар ороскуота учуоттаммат. Манна балаһыанньаны уларытыахха наада дии саныыбын. Үсүһүнэн, ыт боппуруоһа. Уһук хоту бэйдиэ сылдьар ыт диэн суох. Таһаҕас, чох таһыыта тендер нөҥүө ыытыллара сөбө суох. Хочуолунайбыт кыамтата кыра. Инникитин улаатара буоллар.
Гаврил Барабанскай, биэнсийэлээх: — Атомнай станция тутуллуута бырайыак быһыытынан ыытылла турар дуо? Маны таһынан, быраңаатта (пелядь) диэн балыкка бу сылга субсидия көрүллэр дуо?
Софья Олесова, Усуйаана нэһилиэгин баһылыга: — Нэһилиэккэ ыччат элбэх, дьон кэлэн олохсуйар. Дьоҕус, бэйэбитигэр сөптөөх култуурнай-спортивнай комплекс тутуллуута былааҥҥа киирэрэ буоллар. Дьон олохсуйар. Суотабай, интэриниэт сибээс тупсара буоллар. Сэлиэнньэ иһинээҕи суоллары тутууга анал кумах ылар карьер суох. Оскуолабыт хапытаалынай өрөмүөҥҥэ наадыйар. Ыччат бэлиитикэтигэр исписэлиискэ уонна системнэй администраторга каадыр тиийбэт. Кытылы бөҕөргөтөр үлэлэр ыытыллыахтарын наада.
Владимир Слепцов: — Сааскы халаан уутугар барбыт дьоҥҥо түннүккэ дылы ылбыттарга көмө көрүллэр, хара муосталарын ылбыт дьиэлээхтэр көмө ылбаттар. Сүрүнэ ороскуот акылаат уларытыытыгар барар. Ону учуоттуох тустааххыт.
Маны таһынан, олохтоохтор иһэр ууну ыраастыыр станция тутуллуутун, түргэнник ситэр дьиэ кыылларын аҕалыыга көрүллэр субсидиялар тустарынан, тутуу матырыйаалын аҕалыы олус уустуктардааҕын, улууска тиис оҥорор быраас суоҕун эттилэр.
Бырабыыталыстыба отчуоттуур бөлөҕө Усуйаана нэһилиэгэр киирбит боппуруостары болҕомтоҕо ылан, боротокуолга киллэрэн инникитин ыкса үлэлэһиэҕин биллэрдэ.
-
5
-
0
-
0
-
0
-
0
-
0
