Бэлиитикэ

Парламентарийдар Мииринэйдээҕи улуус мунньаҕын дьокутааттарын кытта көрүстүлэр уонна доруобуйа харыстабылын эйгэтигэр улууска ордук сытыытык турар сытыы боппуруостары дьүүллэстилэр. Көрсүһүүгэ оройуон дьаһалтатын мэдиссиинэ хааччыйыытын отделын начаалынньыга Татьяна Бобровская улуус үрдүнэн мэдиссиинэҕэ каадыры тардыы уонна оннунан хаалларыы анал бырагырааматыгар улахан болҕомто уурулларын бэлиэтээтэ. Ол курдук, «Земскэй быраас» бырагырааманан биир кэмнээх төлөбүрү таһынан, саҥа кэлбит быраастар олохтоох бүддьүөттэн 500 тыһ.солк. уонна «Алроса» хампаанньаттан 1,5 мөл. солк. эбии төлөбүр ылаллар эбит. Быйыл итинник үбүнэн-харчынан барыта 27 быраас туһаммыт.

Оройуон дьаһалтата Дьокуускайдааҕы мэдиссиинэ кэллиэһин кытта Мииринэй уонна Удачнай куораттарынан филиаллары өйүүргэ хас да сыл устата араас хабааннаах дьаһаллары ыытар. Кини этэринэн, улуус үрдүнэн доруобуйа харыстабылын сайыннарыытыгар 2025 сылга диэри бигэргэммит муниципальнай бырагыраама тэрээһиннэрэ эмиэ көдьүүстээхтик олоххо киирэллэр.

«Оскуолалар эмчиттэригэр эбии төлөбүрдэр оҥоһуллаллар, чэпчэтиилээх эминэн-томунан туһанааччылар испииһэктэригэр киирбэтэх сорох дьоҥҥо эми-тому атыылаһалларыгар дотация ананар. «Мииринэй оройуонун Бочуоттаах донора» диэн аат хаһаайыныгар биир кэмнээх 15 тыһ. солк. суумалаах төлөбүр бэриллэр. Ону таһынан, АЛРОСА-ны кытта 2023 с. сөбүлэһии түһэрсиллэн, оройуон бүддьүөтүттэн 4,5 мөл. солк. үп-харчы  мэдиссиинэ үлэһиттэрин вахтовай ньыманан үлэлэтэр сыаллаах бырагыраамаҕа көрүллүбүтэ», - диэн Татьяна Бобровская эттэ.

СӨ кылаабынай бырааһа Вера Тарасова кэпсииринэн, исписэлиистэри олохсутан үлэлэтиигэ төһө да итинник үлэ ыытылыннар, быраастарынан хааччыллыы 57 %, орто сүһүөх исписэлиистэринэн хааччыллыы 67 % эбит.

Сис кэмитиэт бэрэссэдээтэлэ Светлана Давыдова мэдиссиинэҕэ каадыр тиийбэтэ Саха Сирин үрдүнэн, ордук киин бырамыысыланнай уонна Аартыка оройуоннарыгар харгыстары үөскэтэрин бэлиэтээтэ. Парламентарий биир хайысхаҕа идэлээх исписэлииһи тыа сиригэр олохсута хаалларыы олус суолталааҕын чопчулаата, тоҕо диэтэр, маннык исписэлииһи бэлэмнээн таһаарарга 10 сыл кэриҥэ кэм ирдэнэр.

Норуот дьокутаата Николай Ноттосов мэдиссиинэ салаатыгар үөрэххэ ылар уонна үөрэнэр устудьуоннар ахсааннарын булгуччу улаатыннарар наадалааҕар тохтоото. Бу этиини норуот дьокутаата Иван Луцкан өйөөтө.

Салгыы дьокутааттар Мииринэй оройуонун баһылыгын бастакы солбуйааччыта Дмитрий Ширинскайы көрүстүлэр, доруобуйа харыстабылын салаатыгар муниципалитет үлэтин-хамнаһын туһунан билистилэр. Маны таһынан кэмитиэт чилиэттэрэ Мииринэйдээҕи киин балыыһа кэлэктиибин кытта көрсөн санаа атастастылар. Аһаҕас кэпсэтии олус таһаарыылаахтык ааста. Быраастар хамнас үрдээһининэн эрэ муҥурдаммакка, доруобуйа харыстабылын салаатыгар сыһыаннаах араас сытыы кыһалҕаларын эттилэр. Ол курдук, саҥа мэдиссиинэ оборудованиетыгар, үлэ усулуобуйатын тупсарыытыгар наадыйыы үрдүк эбит. Түмүккэ киин оройуоннааҕы балыыһаҕа быраас идэтигэр улахан уопут ылалларын бэлиэтээтилэр.

Оробуочай сырыы чэрчитинэн Светлана Давыдова салайааччылаах сис кэмитиэт чилиэттэрэ «СӨ тыа сирин уонна ыраах сытар нэһилиэктэрин мэдииссинэ тэрилтэлэригэр каадырынан уонна эминэн-томунан хааччыйыы кыһалҕалара» диэн тиэмэҕэ көһө сылдьар мунньаҕы тэрийэн ыыттылар. Кэпсэтиигэ Бүлүү бөлөх муниципальнай тэриллиилэрин баһылыктара, мэдиссиинэ тэрилтэлэрин кылаабынай быраастара уонна СӨ Доруобуйаҕа харыстабылын министиэристибэтин бэрэстэбиитэллэрэ кытыннылар.

Сунтаар улууһун баһылыга Анатолий Григорьев тыа сириттэн каадыр көһөн барыытын сүрүн биричиинэтин кэпсээтэ. Тыа сиригэр тупсаҕай олорор дьиэ суоҕа, киин куораттан ыраах сытара, матырыйаалынай-тиэхиньиичэскэй баазата эргэриитэ, үчүгэй үлэ усулуобуйата суоҕа бэлиэтэннэ. Кини тыа сиригэр үлэлиир усулуобуйаны тупсарарга, кылаабынай быраастарга хантараак болдьоҕун 1-тэн 5 сылга диэри улаатыннарарга уонна быраас идэтин социальнай суолтатын үрдэтэргэ этии киллэрдэ.

Бүлүү улууһун сүрүн кыһалҕаларынан норуот дьокутаата, Бүлүүтээҕи киин балыыһа кылаабынай бырааһа Егор Григорьев эдэр исписэлиистэргэ сыл ахсын наадыйыы үрдүгүн бэлиэтээтэ уонна олорор дьиэнэн хааччыйыы тохтоото. Ленскайдааҕы киин балыыһа кылаабынай бырааһа Светлана Куц Ленскайга сыл устата 10 учаастагынан 2 терапевт-быраас уонна биир сэбиэдиссэй эрэ, туох баар административнай үлэҕэ тиийэ дьарыктанналларын эттэ. Каадыр тиийбэтэ олохтоох быраастар үлэлэригэр ноҕуруусканы үрдэтэр уонна үксүн идэ өттүнэн сылайыыга тиэрдэрин быһаарда.

Бу сыалга «АЛРОСА» АХ генеральнай дириэктэрин солбуйааччы Алексей Дьячковскай мунньах кыттыылаахтарыгар ыраах сытар нэһилиэктэргэ уонна вахтовай бөһүөлэктэргэ көһө сылдьар быраастар биригээдэлэрин тэрийии быраактыкатын кэҥэтэргэ этии киллэрдэ. Кини быһаарыытынан, 10 сыл иһигэр толору хааччыллыылаах балыыһа тутуллара бары өттүнэн кэккэ уустуктардаах. Оттон көһө сылдьар быраастар биригээдэлэрин тэрийии каадыр тиийбэтин быһаарыыга сүрүн суолталаах. Норуот дьокутааттара Иван Луцкан уонна Ольга Горохова мэдисссиинэ үлэһитин тус сыаллаах хантараагынан бэлэмнииргэ болдьоҕун улаатыннарарга этии көтөхтүлэр. Холобур, билиҥҥи хантараак болдьоҕунан, 3 сыл ааспытын кэннэ, эдэр исписэлиистэр Дьокуускайга эбэтэр дойду атын эрэгийиэннэригэр бараллар. Онон көһө сылдьар мунньах кыттыылаахтара муниципалитеттарынан каадырдары бөҕөргөтүү боппуруоһун таарыйдылар. Мунньах түмүгэр Ил Түмэн Бочуотунай грамотатынан Мииринэйдээҕи киин балыыһа офтальмолог-бырааһа Анастасия Берилло наҕараадаланна.

Василий Кононов хаартыскаҕа түһэриитэ