- Аҕыйах хонугунан Саха Өрөспүүбүкэтин бэрэстэбиитэллээх сүрүн былаас уорганын Ил Түмэн Бэрэссэдээтэлин талыахтаахпыт. Күн бүгүн дьокутааттар куорпустарыгар онно саамай бэлэмнээх, үрдүк таһымнаах, киэҥ билиилээх, улахан уопуттаах олоҕу уонна үлэни билэр киһинэн Алексей Ильич буолар. Кини араас таһымнаах үлэлэргэ үлэлээн, уопуттаах дьокутаат. Саамай сүрүнэ, юридическэй, быраап боппуруостарыгар биир бастыҥ исписэлииспит буолар. Аны туран, экэниэмикэ боппуруостарын эмиэ эндэппэккэ билэр-көрөр. Кини өрөспүүбүлүкэбит хантан уонна хайдах дохуоттаныахтааҕын, хайдах үптээх-харчылаах буолуохтааҕын, ону сөпкө хайдах тыырыахтаахпытын, эбии дохуоту хайдах ситиһиэххэ сөбүн, ороскуоттарын чопчулуурбутугар үрдүк таһымнаах билиилээх. Ол да иһин, норуот дьокутааттара Алексей Ильиһи убаастыыбыт, билинэбит. Кини биһиги ортобутугар ылыннарыылаах, ыйааһыннаах тыллаах-өстөөх. Аны туран, кини өрөспүүбүлүкэбит интэриэһин туруулаһарыгар, Арассыыйа таһымыгар үлэлэһэригэр атын субъектар салайааччыларын кытта хайа баҕарар үлэлэһэр, федеральнай салалтаны кытта тэбис-тэҥҥэ кэпсэтэр, быһаарсар кыахтаах. Ити олус улахан суолталаах. Тоҕо диэтэххэ, биһиги үөһэ таһымҥа тэҥҥэ, биир муостаҕа туран кэпсэтэр кыахтаах киһилээх буолуохтаахпыт. Оннук киһинэн Алексей Ильиһи ааттыыбын. Ону кини федеральнай былаһааккаларга, араас таһымнаах кэпсэтиилэргэ үгүстүк дакаастаан турар. Ылыннарыылаах тыллаах буолан, кинини билинэллэр. Онон эргиччи бэлэмнээх, киэҥ билиилээх Алексей Ильиһи спикеринэн таллахпытына, сыыстарыахпыт суоҕа.
-
0
-
0
-
0
-
0
-
0
-
0
