Экспердэр блогердары кэтээн көрөөччүлэринэн быыбарга тардыы кутталларын уонна кыахтарын сыаналаатылар. Олохтоох блогердары быыбарга кытыннарар туһунан Карелияҕа уонна Новгородскай уобаласка билиннэ. Кинилэр быыбардыыр учаастактар үлэлэрин, куоластааһын хаамыытын, кэһиилэри хонтуруоллааһын, куолас ааҕыытын туһунан кэпсиэхтэрэ. Холобур, Карелияҕа блогердар үлэлэрин эрэгийиэннээҕи уопсастыбаннай палаата салайыаҕа. Новгородскай уобаласка быыбар үлэтигэр 250-ча блогеры кытыннарыахтара. "Коммерсант" иһитиннэриитинэн, дойду үрдүнэн блогердары үрдүк былааска Госдума быыбарыгар кэтээн көрөөччү быһыытынан кытыннарыахтарын баҕаралларын туһунан биллэрдилэр. Бу бырайыагы киллэрэргэ эрэгийиэннэр үрдүкү былаастарын кытта хайыы-үйэ дьүүллэһии ыытыллар.
Быыбарга блогердары сыһыарыы көдьүүһэ суоҕун, саарбахтыырын биллэр политолог Виталий Ковин этиннэ: «Бу бырайыак ордук пиар-акцияҕа майгынныыр. Кэһии суоҕун туһунан эбии «информационнай тыаһы» тэрийэргэ холонон көрүү курдук. Таҥнарытын кириитикэни иһитиннэрбэт, саҥарбат дьону сыһыарыы курдук сыыһа хамсаныы тэҥэ. Үрдүкү былааска блогердары быыбарга туһаныахтара дии санаабаппын. Уопсастыбаннай кэтээн көрөөччүлэргэ эбии уустуктары уонна мэһэйи үөскэтиэ суохтар этэ".
Оттон СМИ-гэ уонна маассабай коммуникацияны сайыннарыыга дойду уопсастыбаннай палаататын бэрэссэдээтэлин солбуйааччы Константин Комков блогердары быыбарга сыһыарыыга туһалааҕынан ааҕар: «Блогердар сонуннары тарҕатыынан дьарыктаналлар уонна күннээҕи бэбиэскэни оҥороллор. Оттон быйылгы быыбар билигин ордук нэһилиэнньэни интэриэһиргэтэр. Бу өйдөбүлгэ блогердар саҥа рубриканы оҥороллоро интэриэһинэй буолуон сөп. Итиэннэ кинилэр кыахтарын туһаныы быыбарга дьон-сэргэ итэҕэллэрин үрдэтэргэ атын күүһү үөскэтиэ".
Санаттахха, быйыл быыбар кэмигэр уопсастыбаннай хонтуруолу күүһүрдүөхтэрэ. Саха сиринээҕи уопсастыбаннай палаата салайааччыта Николай Бугаев этэринэн, быыбар хаамыытын кэтээн көрөргө ким баҕарар кыттыан сөп.«Уопсастыбаннай кэтээн көрөөччү баартыйаттан тутулуга суох киһи буолуохтаах. Быыбары ыытыы кэмигэр туох да алҕас тахсыбатын кырдьыгынан, туох баарынан көрдөрүөхтээх», — диэн этэр кини.
-
0
-
0
-
0
-
0
-
0
-
0
