Бэлиитикэ

Бүтэһиктээх түмүк маннык буолла:

Степан Саргыдаев, “Биир ньыгыл Арасыыйа” баартыйа -- 5640 (62.74%);

Николай Попов, КПРФ --  2215 (24,64%);

Илья Николаев, “ Новые люди”-- 1065 (11,84)

Барыта 8989 киһи куоластаата, ол аата нэһилиэнньэ 59.79 %-на.

Степан Анатольевиһы кыайыытынан эҕэрдэлиибит уонна биһиги кэрэспэдьиэммит Геннадий Охлопковка быыбарга кыттыан иннинэ биэрбит интервьютун саҥа баһылыгы билиһиннэрэ таарыйа бэчээттиибит.  

***

-- Былааннаахтык олоруу, дьиҥэр, биир күнтэн саҕаланар ээ. «Мин бүгүн тугу гыныахтаахпыный?»  диэнтэн, --  кэпсээн саҕалыыр Степан Саргыдаев. -- Киһи кыра сылдьан былаана -- “утуйан тураат аһаабыт киһи”, “үөрэх кэннэ оонньообут киһи” диэн. Онтон обургу буолбутум кэннэ, дьонум усулуобуйа туруорар буолбуттара: «Оонньуоххун баҕарар буоллаххына, бастатан туран, дьиэтээҕи сорудаххын толор». Дьэ, ити киһини сааһылыыр буолар этэ.

Үрдүкү кылааска тахсарбар, дьарыгым элбээн, күммүн бэйэм былаанныыр буолбутум: үөрэх кэннэ уопсастыбаннай үлэ, спорт куруһуоктара, араас тэрээһиннэр. Аны дьиэ иһигэр-таһыгар көмөм элбээбитэ. Билигин санаатахха, итинник солото суох буолан, куһаҕаҥҥа улдьаарбатах буоллахпыт.

Бириэмэни сатаан аттарар, сөптөөхтүк туһанар буолан, баччаны ситистэҕим дии саныыбын. Устудьуоннуур да сылларбар көхтөөҕүм. Бастакы куурустан бөлөҕүм ыстаарыстата этим, профсойууска баарым. Пединститут волейболга сүүмэрдэммит хамаандатын састаабыгар оонньуурум. Ити кэмнэргэ аны эдэр буоламмыт, дискотекаларга эҥин сылдьарбыт. Оҕолору, кыргыттары кытта билсэр сэргэх түгэннэр этэ. Ити курдук үөрэҕи, үлэни, сынньалаҥы бэркэ дьүөрэлиирбит. 

Онтон ыал буолбутум. Эппиэтинэс өссө улааппыта, ону кытта бириэмэ тэтимэ өссө түргэтээбитэ: үөрэх, уопсастыбаннай үлэ, дьиэ кэргэн, доҕоттор...

Университет кэнниттэн тута дойдубар Чурапчыга тахсан, гимназияҕа үлэлээбитим. Идэбинэн информатика уонна черчение учууталабын. Онно да уопсай үлэттэн туора турбатаҕым, идэлээх сойууска бэрэссэдээтэллээбитим. Аны ыал дьон буоларбыт быһыытынан, түүннэри оҕо көрсөрүм. Үлэни үллэстэн, сүбэни холбоон, бэйэ-бэйэни солбуйсан сылдьыахха наада эбит диэн өйдөөбүтүм.

Чопчу былаан салайааччы буолбутун кэннэ олоҕурбута. Бастаан Чурапчы нэһилиэгэр баһылык солбуйааччытынан анаммытым. Салгыы икки болдьох баһылыктаабытым. Дьэ, онно хас биирдии күнү чаһытыгар тиийэ аттарар буолбутум. Улахан торумнааһыны сыл бүтүүтэ, кэлэр сылга үктэниэх иннинэ, оҥорор үгэстэммитим. Ити үөрүйэх, технология быһыытынан, ханна баҕарар туттуллар буолбута. Билигин миниистирдии да олорон, итинник халыыптаахтык сааһыланан үлэлиибин.

Өскөтүн баһылык быһаччы дьону, нэһилиэнньэни кытта үлэлиир эбит буоллаҕына, министиэристибэ үлэтэ стратегическай диэххэ наада. Бүттүүн Саха сирин ыччата сайдарын, олоҕо тупсарын хааччыйыахтаахпыт. Салайар механизмнары, кэскиллээх бырайыактары тобулуохтаахпыт. Ол толкуйдаммыт, ылыллыбыт миэрэлэр хас биирдии улууска, нэһилиэккэ тиийэн үлэлиэхтээхтэр.

***

Аны бу күнтэн ыла Степан Анатольевич төрөөбүт дойдутун, өр кэмҥэ үлэлээбит улууһун сайдыытыгар туох баар кыаҕын, сатабылын, дьоҕурун ууран туран үлэлиэ диэн эрэнэбит.