Бэлиитикэ

Намнааҕы быыбардыыр хамыыһыйа бэрэссэдээтэлэ Николай Парников куоластааһын түмүгүн иһитиннэрдэ уонна Юрий Иннокентьевич Слепцовка улуус баһылыгын дастабырыанньатын туттарда.

Саха Өрөспүүбүлүкэтин Ил Дархана Айсен Николаев Нам улууһун баһылыгын дуоһунаһыгар өссө төгүл талыллыбытынан Юрий Слепцову эҕэрдэлээтэ.

«Идэҕэр үрдүк билииҥ-көрүүҥ, үлэһит уонна киһи быһыытынан майгыҥ-сигилиҥ, эйиэхэ итэҕэйэр дьонуҥ-сэргэҥ оройуон социальнай-экономическай сайдыытыгар тосхолломмут соруктары ситиһиилээхтик быһаараргар салгыы даҕаны көмөлөһүөхтэрэ, оттон эн бу дуоһунаска үлэҥ саҥаны айаргар-тутаргар, бар дьонуҥ уйгутун таһымын үрдэтэргэр, олохтоох салайыныы институтун бөҕөргөтөргөр туһуланыаҕа диэн бигэ эрэллээхпин. Өрөспүүбүлүкэ салалтата улуус тирээн турар кыһалҕаларын өйдүүр итиэннэ ону быһаарарга кыһамньылаахтык үлэлэһэргэ бэлэм. Эйиэхэ кытаанах доруобуйаны, дьолу-соргуну уонна туох баар торумнаммыт былааныҥ ситиһиилээхтик олоххо киирэригэр баҕарабын», – диэн этиллэр өрөспүүбүлүкэ баһылыгын илдьитигэр.

Парылааман испиикэрэ Алексей Еремеев Нам улууһун саҥа талыллыбыт баһылыгар эҕэрдэ тылын эттэ.

«Биир дойдулаахтарым, күндү быыбардааччыларым, эһиэхэ барыгытыгар, бу саалаҕа олорор салайааччыларынан, баһылыктарынан сирэйдэнэн, махталбын тириэрдэбин! Биһиги улууспутугар буолбатах түбэлтэ буолла – баһылык иккис болдьоҕор хаһан даҕаны киирбэт этэ. Онон Юрий Иннокентьевич Слепцов маҥнайгытынан иккис болдьоххо улууспут баһылыга буолла.

Нам улууһа – сүрдээх баай устуоруйалаах, наһаа үчүгэй дьоннордоох, сирдээх-уоттаах дойду. Максим Кирович Аммосов курдук саха норуотун аптаныамыйатын төрүттээбит, Илья Егорович Винокуров курдук норуотун харгыйар өлүүттэн быыһаабыт чулуу дьоннору таһаарбыт улуус. Биһиги кинилэринэн киэн туттабыт. Ону сэргэ ыанньыксыттарбытынан, отчуттарбытынан, оҕуруотчуттарбытынан, спортсменнарбытынан, доруобуйа харыстабылын, наука, үөрэхтээһин үлэһиттэрбитинэн наар киэн туттабыт. Юрий Иннокентьевич тыа киһитигэр үчүгэй сыһыанынан, кыһамньытынан биллэр. Биһиги кинини Нам улууһун дьиҥнээх патриотунан сыаналыыбыт уонна киэн туттабыт.

Баҕарыам этэ, Юрий Иннокентьевич, эйиэхэ, бастатан туран, кытаанах доруобуйаны! Доруобуйа баар буоллаҕына, эн дьыаланы кыайыаҕыҥ. Аттыгар үчүгэй күүстээх хамаанда баар буоллун! Үчүгэй каадырдары Намтан иитэн таһаар, нэһилиэктэргин көр. Тыа хаһаайыстыбатын эйгэтигэр үлэ таҕыстын. Сүөһү, сылгы иитиитин, сир оҥоруутун бу биэс сылга лаппа тупсарыахтаахпыт диэн сыаллаах-садаачалаах үлэлиэхтээхпит.

Биир дойдулаахтарбар махтаныам этэ биһиги бары сомоҕолоспуппутугар, биир санаанан быыбары ыыппыппытыгар. Быйыл өссө күүскэ түмүстүбүт. Нам улууһа наар биир сомоҕо буолуохтаах. Мин ону, элбэх быыбары ааспыт киһи буоларым быһыытынан, эппинэн-хааммынан билэбин.

Өссө даҕаны күүстээхтик үлэлиэхпит-хамсыахпыт. Нам улууһа туругура турдун, Эҥсиэли хочото сайда турдун, дьоммут-сэргэбит этэҥҥэ олордуннар», – диэн эҕэрдэлээтэ Саха сирин Ил Түмэнин испиикэрэ.

Муниципальнай тэриллии талыллыбыт баһылыга оройуон олохтоохторун иннилэригэр бирисээгэ биэрдэ.

«Российскай Федерация, Саха Өрөспүүбүлүкэтин Конституцияларын, сокуоннарын, “Нам улууһа” муниципальнай тэриллии устаабын толору тутуһуоҕум. Улууһум олоҕун-дьаһаҕын тупсарыыга, улуус үүнүүтүн-сайдыытын туһугар туох баар билиибин-көрүүбүн, үлэм уопутун барытын туттуоҕум. Улуус аатын-суолун, чиэһин үрдүктүк тутуом диэн андаҕайабын!», – диэн эттэ Юрий Слепцов.

Нам улууһун баһылыга олохтоох бэйэни салайыныы сэбиэтигэр, «Биир ньыгыл Россия» баартыйа Намнааҕы салаатыгар, нэһилиэк баһылыктарыгар, тэрилтэ салайааччыларыгар, улуус уопсастыбаннаһыгар, олохтоохторугар, дьиэ кэргэннэригэр, аймахтарыгар барҕа махталын тиэртэ уонна бука барыларыгар дьолу-соргуну, үтүөнү-кэрэни, уйгулаах олоҕу баҕарда.

Ону кытта СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников, СӨ Бырабыыталыстыбатын Бэрэссэдээтэлин солбуйааччыта Ольга Балабкина, СӨ сыана бэлиитикэтигэр судаарыстыбаннай кэмитиэтин бэрэссэдээтэлэ Антонина Винокурова, СӨ тыатын хаһаайыстыбатын миниистирэ Александр Атласов, нэһилиэнньэ үлэлээх буолуутун СӨ судаарыстыбаннай кэмитиэтин бэрэссэдээтэлэ Елена Калашникова уонна Нам улууһун нэһилиэктэрин баһылыктара Юрий Слепцову эҕэрдэлээтилэр.