Хайыы үйэ эhиилги сылтан саҕалаан, аармыйаҕа эр дьону 19 саастарыттан, оттон 2026 сылтан – 21 саастарыттан ыҥырарга этиилэр киирдилэр. Бу РФ Госдуматыгар кулун тутар 13 күнүгэр киллэриллибит сокуон барылыгар кѳрүллэр.
Сокуон барыла «Воинскай эбээhинэс уонна байыаннай сулууспа туhунан» Федеральнай сокуоҥҥа уларытыылары киллэрэр. Онно сѳп түбэhиннэрэн ыҥырыы саҥа систиэмэтигэр кѳhүү 2024 сыл тохсунньу 1 күнүттэн саҕаланыаҕа. Онуоха ыҥырыллар саас этааптарынан үрдэтиллиэҕэ.
Ол курдук, 2024 сыл тохсунньу 1 күнүттэн ахсынньы 31 күнүгэр диэри сулууспаҕа 19-30 саастаах эдэр дьон ыҥырыллыахтара, оттон 2025 сыл тохсунньу 1 күнүттэн ахсынньы 31 күнүгэр диэри – 20-30 саастаахтар уонна 2026 сыл тохсунньу 1 күнүттэн ахсынньы 31 күнүгэр диэри – 21-30 саастаахтар ыҥырыллыахтара.
Онуоха 2024 сыл тохсунньу 1 күнүттэн 18 саастаах уолаттар дойдуларыгар ытык иэстэрин кѳҥүл ѳттүнэн биэрэр буолуохтара. Сокуон барылыгар этиллэринэн, 18 сааhын туолбут эдэр киhи ыйыллыбыт даата кэнниттэн аармыйаҕа сулууспалыы киириэн баҕардаҕына, ыҥырар хамыыhыйаҕа сайабылыанньа суруйар.
Онон байыаннай комиссариаттарга байыаннай сулууспаҕа ыҥырыыттан болдьоҕу уhатар сыаллаах оскуола үѳрэнээччилэрэ уонна устудьуоннар кэлиилэрэ туоратыллыаҕа.
Ону таhынан, сокуон барылыгар 27 саастарын туолбуттары саппааска киллэрии быйыл эрэ оҥоhуллар диэн ыйыллар. Аныгыскы 2024 сылтан 30 саастарын туолбут эрэ эр дьон саппааска киллэриллэр буолуохтара. Ол эрээри гражданин хайыы үйэ киллэриллибит буоллаҕына, кинини эhиил байыаннай сулууспаҕа ыҥырбаттар.
Ыҥырыы болдьохторо уларыйбаттар: сааскы ыҥырыы муус устар 1 күнүттэн от ыйын 15 күнүгэр диэри, оттон күhүҥҥү ыҥырыы – алтынньы 1 күнүттэн ахсынньы 31 күнүгэр диэри ыытыллар.
Быйылгы 2023 сыллааҕы икки ыҥырар хампаанньа уруккулуу ыытыллыахтара.
-
0
-
0
-
0
-
0
-
0
-
0
