СӨ Тыатын хаһаайыстыбатын миниистирин солбуйааччы Прокопий Николаев иһитиннэриитинэн, мелиорация управлениетын дьаһалыгар 94 тыһ. гектар сирдээх, олортон 39 тыһ. гектар ходуһа сирэ туһаныллар. Тыа хаһаайыстыбатын сиригэр-уотугар 484 тыһ. гектар оттуур ходуһа учуоттанар буоллаҕына, дьиҥ чахчытыгар судаарыстыба өйөбүлүнэн мелиорацияҕа өлүүтэ 8% тэҥнэһэр. Саха Сиригэр мелиорацияны сайыннарыы туспа биэдэмистибэннэй бырагырааманан олоххо киирэр. Ааспыт сылга мелиоративнай үлэлэргэ 524 мөл. солк. көрүллүбүт, ол иһигэр өрөспүүбүлүкэ бүддьүөтүттэн – 457 мөл. солк., федеральнай бүддьүөттэн – 27 мөл. солк. Быйылгы былаан 8%-нан 512 мөл. солк. диэри сарбыллыбыт. Ити былаантан 394 мөл. солк. мелиорацияны уонна тыа хаһаайыстыбатын уунан хааччыйыы управлениетын дьаһалларыгар ананар. Туспа ыстатыйанан 116 мөл. солк. тыа хаһаайыстыбатын бородууксуйатын оҥорон таһаарааччылары субсидиялааһыҥҥа көрүллэр.
Миниистири солбуйааччы бастакы боппуруоһунан 11 тыһ. гектарга мелиоративнай систиэмэни чөлүгэр түһэриигэ барыта 698 мөл. солк. ирдэнэрин эттэ. Быйыл былааҥҥа барыта 29 мөл. солк. көрүллүбүт. Иккиһинэн, 44 тыһ. гектарга мелиоративнай үлэлэри ыытыыга 80 систиэмэни чөлүгэр түһэриигэ комплекснай дьаһал ылыллар наадалааҕын бэлиэтээтэ. Кини сыллата бу сыалга уматыгы, тутуу матырыйаалларын, тиэхиньикэни уонна туттар тэриллэри атыылаһыыга наадыйыы улаатарын үрдүнэн, хас сыл ахсын 300 мөл. солк. кэриҥэ индексацияламмакка көрүллэрин эттэ.
СӨ Бырабыыталыстыбатын бэрэссэдээтэлин солбуйааччы Сергей Местников бу боппуруоһу кэмигэр дьүүллэһии суолталааҕын бэлиэтээтэ. Онуоха ыытыллар үлэлэр үп-харчы кээмэйинэн буолбакка, үлэ көдьүүһүн үрдэтиигэ атын резервэлэр туһаныллыахтааҕын быһаарда.
Түмүккэ сис кэмитиэт бэрэссэдээтэлэ Александр Атласов гидромелиоративнай эбийиэктэр кээһиниилэрэ кэнники 15 сылга сүрүннээн килиимэт уларыйыытыттан тахсарын уонна бырагыраама үбүлээһинин улаатыннарыыга хаттаан сорук ылыллара наадалаҕын чопчулаата.
-
0
-
0
-
0
-
0
-
0
-
0
