Сахабыт сиригэр ыччат бэлиитикэтэ 1991 сыллаахтан туспа судаарыстыбаннай уорганнаах (бастаан кэмитиэт, онтон 1992 сыллаахтан министиэристибэ), 1998 сыллаахтан анал сокуоннаах эбит буоллаҕына, Арассыыйаҕа туспа сокуон былырыын эрэ бигэргэннэ.
«РФ ыччат бэлиитикэтин туһунан» саҥа сокуоҥҥа «эдэр испэсэлиис», «эдэр дьиэ кэргэн», «ыччат уопсастыбаннай түмсүүтэ» диэн өйдөбүллэр быраап өттүнэн сиһилэнэллэр. Оччотугар кинилэргэ судаарыстыба өттүттэн өйөбүл миэрэлэрэ уонна үлэлииргэ, айарга-тутарга, сайдарга, дьиэ кэргэн тэринэргэ усулуобуйалары олохтуур толору кыах үөскүүр. Холобур, эдэр наука үлэһиттэрэ, үөрэх бастыҥнара, бырайыак ааптардара, уһулуччулаах спортсменнар уо.д.а.
Бэдэрээссийэ докумуонугар дьүөрэлии «СӨ судаарыстыбаннай ыччат бэлиитикэтин туһунан» сокуоҥҥа уларытыылары киллэрэр барыл бастакы ааҕыыны ааһан, сэтинньи ыйга ылыллара күүтүллэр. Бу туһунан уонна сис кэмитиэт күһүҥҥү сиэссийэҕэ үлэтин былаанын туһунан норуот дьокутаата Михаил Гуляев кэпсиир:
– Арассыыйаҕа ыччат сокуонун барылын оҥорууга уонна дьүүллэһиигэ Саха сирин ыччаттара, министиэристибэ исписэлиистэрэ уонна эдэр парламентарийдар көхтөөхтүк кыттан тураллар. Госдуума дьокутаата Галина Данчикова көмөтүнэн өрөспүүбүлүкэ аатыттан Любовь Клюкина парламент сүрүн тырыбыынатыттан санаатын тиэрдэн турар. Онон хайдах эрэ уопсай хамсааһыҥҥа кыттыгастаах курдук сананабыт. Онтон кэмитиэт былааныттан билиһиннэрдэххэ, ыччат бэлиитикэтин сокуонугар сүрүн хайысха быһыытынан көрүллэр волонтер хамсааһынын салгыы сайыннарар, өйүүр туһунан туспа сокуону ылаары туруорсабыт. Сокуон барыла таҥыллан бүтэн, сөбүлэһиннэриигэ сылдьар.
-
0
-
0
-
0
-
0
-
0
-
0
